ءال-فارابي اتىنداعى قازاق ۇلتتىق ۋنيۆەرسيتەتىندە ق ر پرەزيدەنتىنىڭ ب ا ق سالاسىنداعى سىيلىعىنىڭ لاۋرەاتى، مەملەكەتتىك «دارىن» جاستار سىيلىعى مەن قازاقستان جاستار وداعى سىيلىعىنىڭ يەگەرى، ق ر مادەنيەت قايراتكەرى، فيلوسوفيا عىلىمىنىڭ كانديداتى، «شالقار» راديوسىنىڭ ديرەكتورى بولاتبەك تولەپبەرگەننىڭ 50 جىلدىق مەرەيتويىنا ارنالعان «تۇراقتى دامۋ ماقساتتارى اياسىنداعى جۋرناليستيكا جانە باسپا ءىسى: ءداستۇر مەن جاڭاشىلدىق» اتتى حالىقارالىق عىلىمي-تاجىريبەلىك كونفەرەنسيا ءوتتى.
جيىننىڭ اشىلۋ سالتاناتىندا ق ر پرەزيدەنتىنىڭ كەڭەسشىسى مالىك وتاربايەۆ مەرەيتوي يەگەرىن پرەزيدەنتتىڭ العىس حاتىمەن، ءقازۇۋ-نىڭ پرورەكتورى ءلاززات قالىمبەك قىزى قازاق جۋرناليستيكاسىنا سىڭىرگەن ەڭبەگى ءۇشىن ۋنيۆەرسيتەتتىڭ “ەرەن ەڭبەگى” توسبەلگىسىمەن ماراپاتتادى.
عىلىمي جيىنعا اقىن-جازۋشىلار، ب ا ق باسشىلارى مەن وكىلدەرى، عالىمدار، زيالى قاۋىم وكىلدەرى قاتىسىپ، ءداستۇرلى جۋرناليستيكا مەن سالاداعى جاڭاشىلدىق تۋراسىندا بايانداما جاسادى.
كونفەرەنسيادا بولاتبەك تولەپبەرگەننىڭ “الاڭ جۇرت”، “ۇلتتىق يدەيا - ۇلتتىق مەديا تۇعىرى” اتتى كىتاپتارى مەن جيناقتىڭ تۇساۋى كەسىلدى. جيناققا وسى ۋاقىتقا دەيىنگى شىعارماشىلىعى جانە ساياساتكەرلەر مەن جازۋشىلاردىڭ بولاتبەك تولەپبەرگەن تۋرالى جازعاندارى توپتاستىرىلعان. كونفەرەنسيادا قازىرگى باسپا ءىسى ماسەلەلەرى دە جان-جاقتى قوزعالدى.
“ازاتتىق اڭساعان” دەرەكتى حيكاياتىمدا رەپرەسسيا ۋاقىتىنداعى ءبىر اۋلەتتىڭ تاعدىرى سۋرەتتەلەدى. قازاقستانداعى ۇلتتىق يدەيانىڭ رۋحاني ادامگەرشىلىك نەگىزدەرى دەگەن تۇرعىدا جازىلعان دۇنيە. ۇلتتىق يدەيا 90-جىلداردان باستاپ ماڭىزدى تاقىرىپتاردىڭ ءبىرى بولدى. ءالى كۇنگە دەيىن قازاقستاندا ۇلتتىق يدەيا بار ما، قانداي ماسەلەلەردەن تامىر تارتۋ كەرەك دەگەن نارسە وزەكتىلىگىن جويعان جوق”،- دەيدى بولاتبەك تولەپبەرگەن.
تاقىرىپقا وراي
پەرنەباي دۇيسەنبين، حالىقارالىق “الاش” ادەبي سىيلىعىنىڭ يەگەرى، جازۋشى:
سان قىرلى تۇلعا
بولاتبەك مەكتەپتە وتە جاقسى وقىدى. باسقا وقۋشىلاردان مىنەزىمەن دە، تۇلعاسىمەن دە ەرەكشەلەنىپ تۇراتىن. سول كەزدىڭ وزىندە وبلىستىق، رەسپۋبليكالىق گازەتتەردە ماقالالارى جاريالاندى. العاشقى اڭگىمەسى رەسپۋبليكالىق “اق جەلكەن” جۋرنالىندا باسىلدى. قازاق ۋنيۆەرسيتەتىنە وقۋعا تۇسكەننەن كەيىن، قازاقستان جازۋشىلار وداعى مەن «اتامۇرا» كورپوراسياسىنىڭ جازۋشى ورالحان بوكەي اتىنداعى ستيپەندياسىنىڭ تۇڭعىش يەگەرى اتاندى. جازعاندا ءتىلى كوركەم، جان-جاقتى قاسيەتىمەن كوپتىڭ كوزىنە ءتۇستى. ول - ادەبيەتشى، جازۋشى، جۋرناليست، فيلوسوف، الاشتانۋشى. وسىنداي تۇلعا مەنىڭ شاكىرتىم بولعانىن ماقتان تۇتاتىنمىن.