بۇل ورتالىقتى سينگاپۋردا تاعىلىمدامادان ءوتىپ كەلگەن تاربيەشىلەر جۇزەگە اسىردى.
سينگاپۋرلىق تاجىريبەنىڭ ەرەكشەلىگى – مەكتەپ جاسىنا دەيىنگى بالالاردىڭ الەمدى زەرتتەۋىنە، شىعارماشىلىق داعدىسىن دامىتۋىنا كومەكتەسەتىن جاساندى قالا قۇرۋ، دەپ حابارلايدى Almaty-akshamy.kz
سونىڭ نەگىزىندە №1 بالاباقشا بالاقايلارى تاربيەشىلەرمەن بىرىگىپ جەكە پوليسيا بولىمشەسى، دۇكەنى جانە دارىگەرلىك كابينەتى بار «ارمان قالا» دەكوراسياسىن قۇراستىردى. بۇل قالاشىقتا بالالار ەمىن-ەركىن ويناۋ ءۇشىن بارلىق جاعداي جاسالعان.
145 بالا تاربيە الىپ جاتقان بۇل دامۋ ورتالىعىندا 9 بولمە بار. ءار بولمە بالالاردىڭ شىعارماشىلىق داعدىسىن دامىتۋعا باعىتتالعان: ينكليۋزيا، مونتەسسوري، كىتاپحانا، زەرتحانا، كوركەم ونەر بولمەسى، تۇزدى شاحتا، سونىمەن قاتار، لوگوپەد پەن پسيحولوگ جۇمىس ىستەيتىن كابينەتتەر دە بار.
بالاباقشا مەڭگەرۋشىسى قىمبات قارابالايەۆانىڭ ايتۋىنشا، بالالار ءوز قولىمەن بۇيىمدار دايىنداۋ ارقىلى تانىمدىق، شىعارماشىلىق قابىلەتىن دامىتادى. وسىلايشا بۇلدىرشىندەر ءوز الەمىنىڭ كىشكەنتاي قۇراستىرۋشىسى بولا ءبىلدى.
بۇعان قوسا، بالاباقشا وندىرىستىك مەكەمەلەرمەن ەكسكۋرسيالار وتكىزۋگە كەلىسىم-شارتقا وتىرعان. ولاردىڭ قاتارىندا ءتاۋارلى-سۇت فەرماسى، «Qamshy Brand» ناۋبايحاناسى، تەرى بۇيىمدارىن جاسايتىن سەح بار.
وسىلايشا بالاباقشا تاربيەشىلەرىنىڭ عىلىمي-زەرتتەۋ جۇمىستارى بالالاردىڭ ءوي-ورىسىن كەڭەيتۋگە، سىني تۇرعىدان ويلاۋ، تىڭداۋ، ەستە ساقتاۋ قابىلەتتەرىن دامىتۋعا ىقپال ەتتى. بالالاردىڭ تانىمدىق قىزىعۋشىلىعى مەن شىعارماشىلىق قابىلەتىن دامىتۋعا سەپتىگىن تيگىزدى.
سونىمەن بىرگە، ورتالىقتا بالالاردىڭ سويلەۋ قابىلەتىن دامىتىپ، ءتىلىن جاتتىقتىرۋ ماقساتىندا تەاتر اشىلدى. مۇندا بارلىق بالا شاعىن قويىلىمدارعا قاتىسىپ، ارتىستىك ونەرىن دە شىڭداپ كەلەدى. بۇل بالالاردىڭ مەكتەپكە دەيىن زەيىنىن قالىپتاستىرىپ، شىعارماشىلىق الەۋەتىن جەتىلدىرۋگە مۇمكىندىك بەرەدى.
اتاپ وتسەك، 2023 جىلدىڭ شىلدە ايىندا الماتى قالاسىنىڭ مەكتەپكە دەيىنگى ءبىلىم بەرۋ مەكەمەلەرىنىڭ قىزمەتكەرلەرى «مەكتەپكە دەيىنگى تاربيە مەن وقىتۋ سالاسىندا قايتا دايارلاۋ جانە بىلىكتىلىكتى ارتتىرۋ» كۋرسى بويىنشا سينگاپۋردا تاعىلىمدامادان وتكەن بولاتىن.
جاقىندا مۇندا «بالاباقشاداعى زەرتتەۋشىلىك ىس-ارەكەت ارقىلى بالالاردىڭ تانىمدىق جانە شىعارماشىلىق قابىلەتىن دامىتۋ» تاقىرىبىندا قالالىق سەمينار ءوتتى. قالالىق مەكتەپكە دەيىنگى ءبىلىم بەرۋ ۇيىمدارىنىڭ جەتەكشىلەرىنە وقىتۋدىڭ، وقۋشىلاردىڭ ءارتۇرلى قاجەتتىلىكتەرىن قولداۋدىڭ جانە ىنتالاندىرۋشى وقۋ ورتاسىن قۇرۋدىڭ وزىق تاجىريبەلەرى مەن بىرەگەي ادىستەرى ۇسىنىلدى.