پرەزيدەنتتىككە كانديدات قاراقات ابدەننىڭ ەل وڭىرلەرىندەگى سايلاۋالدى ساپارلارى جالعاسۋدا.
بۇگىن كانديدات شىمكەنت قالاسىنداعى «اگف گرۋپپ» اتتى تىگىن فابريكاسىنىڭ ۇجىمىمەن جۇزدەستى.
كەزدەسۋ بارىسىندا كانديداتتىڭ باعدارلاماسى تانىستىرىلىپ، قوعامداعى وزەكتى ماسەلەلەر مەن الەۋمەتتىك سۇراقتار تالقىلاندى. تىگىن فابريكاسى ۇجىمىنىڭ باسىم كوپشىلىگى ايەلدەر قاۋىمى بولعاندىقتان، ولاردىڭ تاراپىنان كانديدات ۇسىنعان ايەل-انالاردى، كوپ بالالى وتباسىلاردى قولداۋ مەن ۇلتتىق قۇندىلىقتاردى دارىپتەۋگە قاتىستى شارالارعا باسا ءمان بەرىلدى.
«وتباسى مەن انالاردىڭ الەۋمەتتىك ماسەلەلەرى – بۇل ەل ەكونوميكاسىنىڭ دامۋىن كورسەتەتىن بىردەن-بىر كورسەتكىش. مەنىڭ سايلاۋالدى باعدارلامامدا بۇل سۇراقتارعا كوپ كوڭىل بولىنگەن. ءاربىر وتباسى، اسىرەسە كوپ بالالى وتباسىنىڭ رۋحاني-ونەگەلىك الەۋەتى زور، سوندىقتان ول حالىقتىڭ عاسىرلار بويى جيناقتالعان ۇلتتىق قۇندىلىقتارىن ساقتاپ، ۇرپاقتان-ۇرپاققا جەتكىزەتىن ماڭىزدى ۇعىم بولىپ تابىلادى. قازىرگى كەزدە وتباسى ينستيتۋتىن جان-جاقتى نىعايتۋ، ونىڭ مارتەبەسىن ارتتىرۋ، كوپ بالالى انالارعا قولداۋ كورسەتۋ ەرەكشە ماڭىزدى»، - دەدى ق.ابدەن.
سونداي-اق بۇگىنگى كەزدەسۋگە وبسە بايقاۋشىلار ميسسياسىنىڭ وكىلدەرى كريستوفەر ماككالوۋ مەن كريستينا بوگدانوۆا قاتىستى. ولار ۇگىت-ناسيحات ناۋقانىنىڭ بارىسىمەن، قاراقات ابدەننىڭ سايلاۋالدى شتابتارىنىڭ جۇمىسىمەن تانىستى.
ەسكە سالساق، ەلىمىزدە 20 قاراشا كۇنى كەزەكتەن تىس پرەزيدەنت سايلاۋى وتەدى. كانديدات ق.ابدەن ەل ايماقتارىن ارالاپ، 8 وبلىستا 30-دان استام كەزدەسۋ وتكىزدى. الداعى ۋاقىتتا ول تۇركىستان جانە جامبىل وبلىستارىنىڭ سايلاۋشىلارىمەن جۇزدەسەدى.