قازاقستان پرەزيدەنتى استانا حالىقارالىق فورۋمىندا ەكولوگيا ماسەلەسىن كوتەردى.
مەملەكەت باسشىسى حالىقارالىق ارالدى قورعاۋ قورىن قولداۋعا كوبىرەك قارجى بولۋگە شاقىردى، دەپ حابارلايدى Almaty-akshamy.kz.
«ايماقتاعى ەكى ۇلكەن وزەن سىرداريا مەن ءامۋدارياداعى سۋ دەڭگەيى 2050 جىلعا قاراي 15 پايىزعا تۇسەدى. ءبىز ايماقتاعى ەكولوگيالىق اپاتتىڭ الدىن الۋ ءۇشىن حالىقارالىق ارالدى قورعاۋ قورىن قولداۋعا كوبىرەك قارجى بولۋگە شاقىرامىز. سۋ مەن كليماتتىڭ وزگەرۋ ماسەلەسى ءوزارا تىعىز بايلانىستى. ورتالىق ازيا – سۋ قاۋىپسىزدىگىن ساقتاۋ تىعىز ارىپتەستىك جانە بىرلەسكەن ءتيىمدى شارالاردى جۇزەگە اسىرۋ ارقىلى عانا شەشىلەتىن ايماق. ايماقتاعى كليمات جانە وزگە دە ماسەلەلەردى تالقىلاۋ ءۇشىن مەن الماتىدا ورتالىق ازيا ەلدەرىنىڭ جوبالىق كەڭسەسىن قۇرۋدى جانە بۇۇ سەكىلدى حالىقارالىق ۇيىمداردى تارتا وتىرىپ، 2026 جىلى قازاقستاندا ايماقتىق كليماتتىق سامميت وتكىزۋدى ۇسىنامىن»، - دەدى قاسىم-جومارت توقايەۆ.
سونىمەن قاتار مەملەكەت باسشىسى «جاسىل» ەكونوميكاعا قاجەتتى جىلدامدىقپەن كوشۋ ءۇشىن ءتيىستى رەسۋرستار كەرەك ەكەنىن ايتتى
«ەلىمىز «جاسىل» ەكونوميكانىڭ مول مۇمكىندىكتەرىن ۇسىنىپ، قايتا قالپىنا كەلتىرىلەتىن ەنەرگەتيكانىڭ ورتالىعى اتانا الار ەدى. الايدا ۋاقىت ءبىزدىڭ جاعىمىزدا ەمەس. كومىردى از تۇتىنۋ جانە «جاسىل» ەكونوميكاعا قاجەتتى جىلدامدىقپەن كوشۋ ءۇشىن بىزگە رەسۋرستار مەن سەرىكتەستىك بايلانىس قاجەت»، - دەدى پرەزيدەنت.
بۇدان بۇرىن حابارلانعانداي، بۇگىن ەلورداداعى كونگرەسس ورتالىقتا استانا حالىقارالىق فورۋمى جۇمىسىن باستادى.
فورۋم كليماتتىڭ وزگەرۋىنە، ازىق-تۇلىك تاپشىلىعىنا جانە ەنەرگەتيكالىق قاۋىپسىزدىككە قاتىستى ماسەلەلەردى شەشۋ جولدارىن قاراستىرۋ ماقساتىندا شەتەل ۇكىمەتتەرىنىڭ، حالىقارالىق ۇيىمداردىڭ، بيزنەس پەن عىلىمي ورتانىڭ جوعارى لاۋازىمدى دەلەگاتتارىنىڭ ديالوگىنە ارنالعان الاڭ بولماق.