مەملەكەت باسشىسى قاسىم-جومارت توقايەۆ استانا حالىقارالىق فورۋمىنىڭ جالپى وتىرىسىندا وسىنداي پىكىر ايتتى.
پرەزيدەنت مادەنيەت پەن قۇندىلىقتار ارناسىندا ارتىپ كەلە جاتقان ىركىلىستەر ەكزيستەنسيالدى قاتەرگە اينالىپ كەلە جاتقانىن ايتتى، دەپ حابارلايدى Almaty-akshamy.kz.
«بۇل قاتەر بارعان سايىن كۇردەلەنىپ وتىر. ويتكەنى دەزينفورماسيا كەڭىنەن تارالىپ جاتىر جانە بارعان سايىن ۇتقىر ءارى ءقاۋىپتى بولىپ بارادى. جاساندى زەيىننەن باستاپ بيوتەحنولوگيالارعا دەيىنگى جاڭا تەحنولوگيانىڭ جاھاندىق اسەرى قاتتىراق سەزىلە باستادى. دەگەنمەن ولارعا باعىتتالعان جۇمىس تەك تار شەڭبەردەگى ۇلتتىق شەكارالاردا ءجۇرىپ جاتىر. بۇل فاكتورلار جاھاندىق تارتىپكە قىسىم كورسەتىپ، اينىمالى ماسەلەلەرگە يتەرمەلەيدى»، - دەدى قاسىم-جومارت توقايەۆ.
مەملەكەت باسشىسى الەم ەلدەرىنىڭ اراسىندا سەنىمسىزدىكتىڭ ارتقانىن ايتتى.
«بۇل قاۋىپسىزدىك رەجيمدەرى مەن يادرولىق جاپپاي قىرىپ-جويۋ قارۋىن تاراتپاۋ تەتىكتەرىنىڭ اياسىندا جۇمىس ىستەپ كەلگەن حالىقارالىق فورۋمداردىڭ قىزمەتىنە كەرى اسەر ەتەدى. وسىلايشا، ءبىز بەلگىسىزدىككە، تۇراقسىزدىق پەن قاقتىعىستارعا تاپ كەلىپ جاتىرمىز. بۇل ءوز كەزەگىندە قورعانىس شىعىندارىن، سايىپ كەلگەندە، ەشتەڭەگە كەپىلدىك بەرمەيتىن ەڭ جاڭا قارۋ-جاراققا جۇمسالاتىن شىعىنداردى ارتتىرۋعا يتەرمەلەيدى. ونىڭ دالەلى دە بار. جارتى عاسىردا العاش رەت يادرولىق قارۋدى قولدانۋ تاۋەكەلىنە تاپ كەلدىك»، - دەدى پرەزيدەنت.
ايتا كەتەيىك، ەلوردادا استانا حالىقارالىق فورۋمى ءوتىپ جاتىر.
سونىمەن قاتار قىرعىزستان پرەزيدەنتى سادىر جاپاروۆ، بوسنيا جانە گەرسەگوۆينا پرەزيديۋمىنىڭ ءتوراعاسى جەلكا سۆيانوۆيچ، وزبەكستان پرەمەر-مينيسترى ابدۋللا اريپوۆ، يۋنەسكو باس ديرەكتورى ودرە ازۋلە، حالىقارالىق ۆاليۋتا قورىنىڭ باسقارۋشى ديرەكتورى كريستالينا گەورگييەۆا جانە باسقا دا سپيكەرلەر ءسوز سويلەيدى دەپ جوسپارلانعان.