«حالىق قاتىساتىن بيۋدجەت» جوباسىنىڭ ارالىق قورىتىندىسى شىقتى

الماتىدا «حالىق قاتىساتىن بيۋدجەت» اياسىندا قالالىق ورتانى دامىتۋعا 400-دەن استام ءوتىنىم ءتۇستى

الماتىدا اۋدان اۋماعىن دامىتۋ مەن اباتتاندىرۋدى كوزدەيتىن «حالىق قاتىساتىن بيۋدجەت» جوباسىنىڭ ارالىق قورىتىندىسى شىقتى، دەپ حابارلايدى almaty-akshamy.kz

بيىل 1 قىركۇيەكتەن باستاپ تۇرعىنداردان budget.open-almaty.kz ينتەرنەت پورتالىنا 682 ۇسىنىس تۇسكەن. ءوتىنىم 20 قىركۇيەككە دەيىن قابىلدانادى.

باستامالاردىڭ كوبى جەتىسۋ (218)، ناۋرىزباي (148)، الاتاۋ (124)، المالى (45) جانە تۇركسىب (44) اۋداندارىنىڭ تۇرعىندارىنان كەلىپ ءتۇستى.

الماتىلىقتاردىڭ ۇسىنىسى نەگىزىنەن بالالار مەن سپورت الاڭدارىن سالۋ نەمەسە جوندەۋ؛ قوعامدىق ورىنداردا بەسەدكالار، ورىندىقتار، قوقىس جاشىكتەرىن ورناتۋعا؛ اۋماقتى كوگالداندىرۋعا، تروتۋارلاردى، ارىقتار مەن پاندۋستاردى سالۋعا جانە جوندەۋگە قاتىستى بولدى.

ۇسىنىستاردى تۇرعىندار budget.open-almaty.kz ينتەرنەت پورتالى ارقىلى وزدەرى ۇسىنعان. ول ءۇشىن تىركەلىپ، ءوتىنىمدى تولتىرىپ، جوبالىق ۇسىنىستىڭ اتاۋى مەن قۇنىن، سيپاتتاماسىن، نىساننىڭ مەكەنجايىن كورسەتىپ،  ۇسىنىستىڭ نوبايى مەن سمەتاسىن (شامامەن ەسەپتەلگەن) تىركەۋ قاجەت.

جوبالىق ۇسىنىستار كەلەسى ساناتتار مەن كريتەرييلەرگە سايكەس كەلۋى كەرەك:

1) كوگالداندىرۋ؛

2) تروتۋارلاردى جايلاستىرۋ؛

3) تروتۋارلاردى، پاندۋستاردى، ارىقتاردى سالۋ جانە جوندەۋ؛

4) ورتاق پايدالانىلاتىن ورىنداردى (ساياباق، سكۆەر، جاياۋ جۇرگىنشىلەر ايماعى، كوشە جانە ت.ب. نىسانداردى) قۇرۋ، جوندەۋ جانە جارىق تارتۋ؛

5) جيەكتاستاردى، كەسپە تاستاردى، تىرەۋىش قابىرعالارىن جوندەۋ؛

6) كۇرەسىندەردى جويۋ؛

7) بالالار ويىندارى مەن ەرەسەك تۇرعىنداردىڭ دەمالىسىنا ارنالعان بەسەدكا، ورىندىق، قوقىس جاشىكتەردى، جابدىقتار مەن كونسترۋكسيالاردى جالپى پايدالانىلاتىن ورىنداردا ورناتۋ جانە جوندەۋ؛

8) اۋلا اۋماقتارىندا جانە جالپى پايدالانىلاتىن جەرلەردە سپورت الاڭدارىن (ترەناجەر الاڭدارىن، فۋتبول، باسكەتبول، ۆولەيبول الاڭدارىن)، بالالار ويىن الاڭدارىن ورناتۋ، جوندەۋ جانە جارىق جۇرگىزۋ؛

9) تازالىقتى قامتاماسىز ەتۋ.

ءبىر جوبالىق ۇسىنىستى ىسكە اسىرۋدىڭ قۇنى 86،2 ملن تەڭگەدەن (25 مىڭ اەك) اسپاۋعا ءتيىس. ءبىر اۆتور ءبىر جوباعا ءوتىنىش بەرە الادى. سونىمەن قاتار، بۇل جالپى پايدالانۋ نىسانى بولۋى كەرەك جانە ونى جۇزەگە اسىرۋ سول اۋماق تۇرعىندارىنا ماڭىزدى بولۋى كەرەك ءارى جەكە كوممەرسيالىق سيپاتتا بولماۋى كەرەك.

ءوتىنىم قابىلداۋ مەرزىمى اياقتالعاننان كەيىن قالا تۇرعىندارىنىڭ بارلىق جوبالىق ۇسىنىسىن ءاربىر اۋدان اكىمدىگى جانىنان قۇرىلعان ساراپتامالىق كوميسسيالار قارايدى. ساراپتامالىق كوميسسيالاردىڭ قۇرامىن 2023 جىلعى «جوبالار بويىنشا ماتەريالدار» بولىمىنەن كورۋگە بولادى.

ساراپتامالىق كوميسسيالاردىڭ باعالاۋ ناتيجەسى بويىنشا «حالىق قاتىساتىن بيۋدجەتتىڭ» كريتەرييىنە، ساناتى مەن شارتىنا سايكەس جوبالار داۋىس بەرۋ كەزەڭىنە دەيىن جىبەرىلەدى. قالا ءۇشىن ەڭ باسىم جوبالار ءۇشىن ونلاين داۋىس بەرۋ وسى جىلدىڭ 13-23 قازان ارالىعىندا وتەدى.

«حالىق قاتىساتىن بيۋدجەت» بويىنشا كەڭەستى اۋدان اكىمدىكتەرىنەن نەمەسە Open Almaty اكىمدىگىنىڭ قوعامدىق قابىلداۋ بولمەسىنەن مىنا تەلەفون نومىرلەرى ارقىلى الۋعا بولادى: 224 39 29 (ىشكى. 203، 127)، 1308.