كينوورتالىق جاڭا جوبالارىن تانىستىردى.
كۇنى كەشە الماتىدا كينوكونتەنت وندىرۋشىلەردىڭ، پروديۋسەرلەردىڭ، ديستريبيۋتورلىق كومپانيالاردىڭ، سەيلس-اگەنتتەردىڭ، كينو جەلىلەرىنىڭ، ستريمينگتىك پلاتفورمالاردىڭ، حالىقارالىق كينوفەستيۆال باعدارلاماشىلارىنىڭ، ەۋروپا جانە تمد ەلدەرىندەگى كينو سالاسىندا قىزمەت كورسەتەتىن كومپانيالاردىڭ قاتىسۋىمەن Eurasian Film Market حالىقارالىق كينو نارىعى باستالدى، دەپ حابارلايدى Almaty-akshamy.kz.
ۇلتتىق كينونى قولداۋ ورتالىعىنىڭ حابارلاۋىنشا، وتاندىق كينو سالاسىنىڭ باس قارجى وپەراتورى بولىپ تابىلاتىن ۇلتتىق كينونى قولداۋ مەملەكەتتىك ورتالىعى كينونارىق قاتىسۋشىلارىنا ءوز جوبالارىن العاش بولىپ ۇسىندى.
العاشقى بولىپ ءسوز العان ۇكقمو باسقارما ءتوراعاسى قۇرمانبەك جۇماعالي كينوورتالىق 2019 جىلى قۇرىلعان ساتتەن باستاپ جالپى سوماسى 17 ملرد تەڭگەگە 100-دەن استام كينوجوباعا مەملەكەت تاراپىنان قولداۋ كورسەتىلگەنىن ايتا كەتتى. ولاردىڭ ىشىندە 47 تولىقمەتراجدى فيلم، 25 دەرەكتى فيلم، 24 قىسقامەتراجدى فيلم جانە 8 انيماسيالىق فيلم بار.
«ءبىز بۇل جۇمىستى جالعاستىرا وتىرىپ، وتاندىق كينونارىقتى قولداۋدىڭ جاڭا مەحانيمزدەرىن ەنگىزۋدى جوسپارلاپ وتىرمىز. ءقازىر بىزدە جۇزەگە اسىرىلۋى كەرەك قىسقا جانە ۇزاق مەرزىمدى مىندەتتەر بار. ولار، ەڭ الدىمەن، قولدانىستاعى «كينەماتوگرافيا تۋرالى» زاڭدى، ەرەجەلەر مەن نقا-نى جەتىلدىرۋگە قاتىستى. سونداي-اق، كونكۋرسقا قۇجاتتاردى تاپسىرۋ ءراسىمىن دە سيفرلاندىرۋ جوسپارلانۋدا»، - دەدى قۇرمانبەك جۇماعالي.
ودان كەيىن جينالعان جۇرتقا ۇكقمو باسقارما ءتوراعاسىنىڭ ورىنباسارى باۋىرجان شوكەنوۆ كينوورتالىقتىڭ پروكاتقا شىعۋعا دايىن كينوكارتينالارىن ۇسىندى. ولاردىڭ ىشىندە قازان ايىندا يسپانياداعى بەدەلدى كينوفەستيۆالدە كورسەتىلەتىن اسحات كۋچينچيرەكوۆتىڭ «باۋىرىنا سالۋ»، سانجار ءمادي، داۋرەن سەرعازين، اسىلحان تولەپوۆ، گۇلناز جولانوۆا سىندى تاماشا اكتەرلىك قۇراممەن ەرەكشەلەنەتىن دانيار يبراگيموۆتىڭ «بۇركىت» ەكشن-فيلمى بار.
سونداي-اق، ايگىلى ءادىلحان ەرجانوۆتىڭ «ءمۇيىزتۇمسىق» اتتى جاڭا جۇمىسى جانە فارحات ءشارىپوۆتىڭ «ا-ستۋديو» اندەرىنە نەگىزدەلگەن اۋقىمدى «ماحاببات سولداتى» ميۋزيكلى تانىستىرىلدى. بۇل جوباعا بايعالي سەركەبايەۆتىڭ ءوزى پروديۋسەر-كەڭەسشى رەتىندە تارتىلعان. سونىمەن بىرگە ماكسيم اكباروۆ پروديۋسەرلىك ەتەتىن «جازا» اتتى سىبايلاس جەمقورلىق تۋرالى ەكشن-دراماسى جانە قازاق رەپىنىڭ پايدا بولۋى تۋرالى ايتورە ءجولداسقاليدىڭ دەبيۋتتىك «شۋلاما» جۇمىسى كورەرمەندەردىڭ ەرەكشە قىزىعۋشىلىعىن تۋدىردى.
سونىمەن قاتار، كينوورتالىق جەكە بلوكتا 2022-2023 جىلى مەملەكەت قولداۋىمەن تۇسىرىلگەن فيلمدەردىڭ ترەيلەرلەرىن تانىستىردى.
Eurasian Film Market – بۇل كينويندۋستريانىڭ زاماناۋي قاجەتتىلىكتەرىنە جاۋاپ بەرەتىن، وڭىرلىك ىنتىماقتاستىقتىڭ شەكاراسىن كەڭەيتەتىن جانە جەرگىلىكتى، الىس-جاقىن شەتەلدىڭ كينويندۋسترياسىنىڭ بيزنەس-بايلانىستارىن قالىپتاستىراتىن جىل سايىنعى فورۋم. شارا اياسىندا كينويندۋستريانىڭ وزەكتى ماسەلەلەرىنە، سونىڭ ىشىندە كونتەنتتى ديستريبۋسيالاۋ، كورسەتىلىم تەحنولوگيالارى جانە كينو سالاسىنداعى حالىقارالىق ىنتىماقتاستىق تۋرالى پانەلدىك پىكىرتالاستارعا ارنالعان ءبىرقاتار ءىس-شارالار جوسپارلانعان. فورۋم ءتورت كۇنگە سوزىلادى.