الماتىدا «حالىق قاتىساتىن بيۋدجەت» باعدارلاماسى ارقىلى قالانىڭ ينفراقۇرىلىمىن جاقسارتۋ جوبالارى قارقىندى جۇزەگە اسۋدا. بۇل باعدارلاما ءار تۇرعىنعا ءوز اۋدانىنىڭ دامۋىنا تىكەلەي ۇلەس قوسۋعا مۇمكىندىك بەرەدى. ناتيجەسىندە الماتى ءومىر سۇرۋگە قولايلى، جايلى قالاعا اينالىپ كەلەدى.
المالى اۋدانىنىڭ كورىكتەندىرۋ ءبولىمىنىڭ باس مامانى كەرىمحان ابدراماننىڭ ايتۋىنشا، شيەۆچەنكو كوشەسى، 157ء-ۇيدىڭ اۋلاسى بىرنەشە ايدىڭ ىشىندە جاڭارتىلدى.
– بىزگە قالا تۇرعىنى جۇگىندى. ول قارت ءارى ناۋقاس اناسىمەن اۋلادا ءجۇرۋدىڭ قولايسىز ەكەنىن ايتتى. ءوز ۇسىنىسىن جەتكىزگەننەن كەيىن باسقا دا تۇرعىنداردان پىكىرلەر ءتۇستى. سودان سوڭ جوبا budget.open-almaty.kz پورتالىندا ماقۇلداۋ مەن داۋىس بەرۋ كەزەڭىنەن ءوتتى. كوميسسيانىڭ شەشىمىمەن ۇسىنىلعان جوبا جۇزەگە استى. وسىدان كەيىن ءتۇرلى جاستاعى بالالارعا ارنالعان ويىن الاڭدارى ورناتىلدى. بۇدان بولەك اسفالت توسەلىپ، كىر جايعىش ورىن جاسالدى، شامدار ورناتىلدى. ءقازىر مۇندا كەشكە دەيىن بالالار ويناپ جۇرەدى. اسىرەسە ەرەكشە جاسالعان كەدەرگىلەر جولاعى بالالارعا قاتتى ۇنايدى، – دەدى سپيكەر.
ونىڭ ايتۋىنشا، المالى اۋدانىندا «حالىق قاتىساتىن بيۋدجەت» جوباسىنا بارلىعى 755 ءوتىنىم مەن ۇسىنىس تۇسكەن.
– سونىڭ 426-سى داۋىس بەرۋگە شىعارىلىپ، 45 جوبا جۇزەگە اسىرىلاتىن بولىپ تاڭدالدى. سونىڭ ىشىندە وسى اۋلا دا بار. مەردىگەر ۇيىم جوبانىڭ باستاماشىسىمەن ارنايى سويلەسىپ: «ءوز اۋلاڭىزدا نەنى كورگىڭىز كەلەدى؟» – دەپ سۇرادى. بارلىق ماسەلە ناقتىلانىپ، كەلىسىلگەننەن كەيىن قاجەتتى جۇمىستار اتقارىلدى. ونىڭ ناتيجەسىن ەندى ماڭايداعى تۇرعىندار باعالاي الادى، – دەدى كەرىمحان ابدرامان.
جوبا باستاماشىسى سابىر نابييەۆ تە اۋلاداعى جاياۋ جۇرگىنشى جولىن اسفالتتاپ بەرۋدى سۇراپ، اكىمدىككە جۇگىنگەن:
– بۇرىن جۇرۋگە ونشا قولايلى ەمەس ەدى، ال ءقازىر جاڭارعان بالالار الاڭقايىن كورىپ وتىرمىز. مۇندا قوقىس جاشىكتەرى اۋىستىرىلىپ، ىڭعايلى ورىندىقتار قويىلدى. كەشكىسىن بالالار وينايدى، ءجاسوسپىرىم قىزدار الاڭدا بي ۇيرەنىپ ءجۇر. بيلىككە ءوز ۇسىنىسىڭدى بەرۋگە بولاتىنىن بىلگەندە، تۇرعىنداردىڭ بارلىق تىلەگىن ەسكەرۋگە تىرىستىم، كەيىن كورشىلەر دە قوسىلدى. ءسويتىپ اۋلامىز نەبارى بىرنەشە ايدىڭ ىشىندە وزگەرىپ شىعا كەلدى، – دەدى ول.
وسى الاڭدا 5 جاسار ۇلى اداممەن بىرگە جۇرگەن جەرگىلىكتى تۇرعىن سالۆي اسمانوۆا دا بۇل جەردىڭ جۋىردا بالاسىنىڭ ەڭ سۇيىكتى وينايتىن ورنىنا اينالعانىن ايتتى:
– ءبىز مۇندا كۇندە كەلەمىز. ادامعا بارلىق ويىن قۇرىلعىلارى ۇنايدى، اسىرەسە ەپتىلىكتى دامىتاتىن كەدەرگىلەر جولاعى قاتتى قىزىقتىرادى. بالالار قۋانا وينايدى، ال بۇل ۇيلەردىڭ تۇرعىندارى اۋلامىزدىڭ وزگەرگەنىنە ريزا. ەرەسەكتەر ءۇشىن دە بۇرىن جەتىسپەيتىن ورىندىقتار قويىلدى. ەندى اتا-انالارعا ىڭعايلى، الىسقا بارماي-اق، قاسىندا وتىرىپ سەرۋەندەي الادى.
سوڭعى وزگەرىستەر بولعان ورىنداردىڭ ءبىرى – المالى اۋدانىنداعى قاراساي باتىر كوشەسىندەگى، ابىلاي حان مەن ناۋرىزباي باتىر كوشەلەرىنىڭ اراسىنداعى شاعىن ساياباق.
ەندى بۇل اۋماقتا جايقالعان كوگال كوز قۋانتادى. اۆتوسۋارۋ جۇيەسىنىڭ ارقاسىندا وتىرعىزىلعان بۇتالار مەن باسقا دا جاسىل جەلەك قۋراپ قالمايدى. سونداي-اق تاس توسەلىپ، جارىق شامدارى جاڭارتىلدى، كولەڭكەدە وتىرىپ دەمالعىسى كەلگەن تۇرعىندارعا ىڭعايلى ورىندىقتار قويىلدى.
ايگەرىم مەن ايمان كۇندە وسىندا جۇمىسىنا قاتىنايدى، تۇسكى ۇزىلىستە سەرۋەندەيدى.
– ءبىز وسى ماڭدا ىستەيمىز، – دەدى جولىققان قىزدار. – جوندەۋدەن كەيىن مۇندا ءجۇرۋ الدەقايدا قولايلى ءارى جاعىمدى بولدى. ەندى بۇل اللەيامەن جۇرگەننىڭ ءوزى كوڭىلدى، ىڭعايلى ءارى تەز. ورىندىققا وتىرىپ تىنىعۋعا، دوستارمەن كەزدەسۋگە مۇمكىندىك جاسالعان. ەشقانداي قولايسىزدىق جوق، ءبارى جاقسى دەمالۋعا جاعداي جاسايدى.
«حالىق قاتىساتىن بيۋدجەت» باعدارلاماسى اياسىندا بوستاندىق اۋدانىندا «وربيتا-3» جانە «وربيتا-4» شاعىناۋداندارىنداعى بالالار الاڭقايلارى رەتكە كەلتىرىلدى، اۋلالار اباتتاندىرىلدى، التى كوشەدە تەحنيكالىق تروتۋار سالىندى.
كوممۋنالدىق شارۋاشىلىق ءبولىمىنىڭ باسشىسى ۇلان قۇتتىمبەتوۆتىڭ ايتۋىنشا، «حالىق قاتىساتىن بيۋدجەت» باعدارلاماسى اياسىندا «وربيتا-4» شاعىناۋدانىندا، 6-شى جانە 7ء-شى ۇيلەردىڭ اراسىنداعى جاياۋ جۇرگىنشىلەر ايماعىنا اعىمداعى جوندەۋ جۇمىستارى جۇرگىزىلدى.
بوستاندىق اۋدانى اكىمىنىڭ اپپاراتى (ج ش س «نيكونستروي») 2024 جىلعى 23 شىلدەدە «وربيتا-4» شاعىناۋدانىندا جاياۋ جۇرگىنشىلەر ايماعىن اباتتاندىرۋ جۇمىستارىن باستادى. جوبانىڭ ماقساتقا ساي بولۋى كوپقاباتتى ءۇي تۇرعىندارى ءۇشىن جايلى ءومىر ءسۇرۋ جاعدايىن جاساۋ قاجەتتىلىگىمەن تۇسىندىرىلەدى.
اۋماقتى اباتتاندىرۋ، ويىن الاڭدارى مەن سپورتتىق قۇرال-جابدىقتاردىڭ، دەمالىس ايماقتارىنىڭ كوبەيۋى تۇرعىنداردىڭ كۇندەلىكتى ءومىرىن ايتارلىقتاي تۇرلەندىرىپ، ادامداردىڭ ومىرلىك بەلسەندىلىگىن قالىپتاستىرادى.
جوبا اياسىندا 1817 شارشى مەتر برۋسچاتكا، 1704 شارشى مەتر اسفالت جابىندىسى، 840 شارشى مەتر رەزەڭكە جابىندى توسەلدى، 175 پ.م گابيون سالىندى، 42 سىرتقى جارىقتاندىرۋ تىرەگى، شاحمات ۇستەلى، جاتتىعۋ جانە بالالار الاڭى، ۆوركاۋت ايماعى ورناتىلدى. ايتا كەتۋ كەرەك، بۇگىندە بارلىق جۇمىستار تولىق اياقتالدى، – دەپ اتاپ ءوتتى ۇلان قۇتتىمبەتوۆ.
«وربيتا» شاعىناۋدانىنىڭ تۇرعىنى سەرىك نۇربەكوۆ وسى اۋداندا 20 جىلدان استام ۋاقىت تۇرادى جانە حقب جوباسىنىڭ جۇزەگە اسۋىنا قاتىستى ءوز ويىمەن ءبولىستى.
– اۋلامىزدى «حالىق قاتىساتىن بيۋدجەت» باعدارلاماسى اياسىندا اباتتاندىرعاندارىڭىز ءۇشىن العىس ايتقىم كەلەدى. ءقازىر الدەقايدا جايلى ءارى ءقاۋىپسىز بولدى – جاڭا ورىندىقتار، جارىق شامدارى، بالالار الاڭقايى ورناتىلدى. اۋلامىز جانداندى، بالالار ويناپ ءجۇر، قارتتار ورىندىقتا دەمالىپ وتىر. تۇرعىنداردىڭ وتىنىشىنە نازار اۋدارىپ، ناقتى وزگەرىستەر جاساعاندارىڭىزعا راقمەت! وسىنداي جوبالار الداعى ۋاقىتتا دا جالعاسىن تابادى دەپ ۇمىتتەنەمىن، – دەدى تۇرعىن.
اباتتاندىرۋعا قاتىستى پىكىرىن «وربيتا» شاعىناۋدانىندا تۇراتىن الماتىلىق ۆالەريا كيم دە ءبىلدىردى.
– «حالىق قاتىساتىن بيۋدجەت» باعدارلاماسى بويىنشا اۋلامىزدى اباتتاندىرعاندارىڭىز ءۇشىن ۇلكەن راقمەت! بۇل جەر كوپتەن بەرى جوندەۋدى قاجەت ەتىپ تۇرعان ەدى، ويتكەنى «وربيتا» – قالانىڭ ەسكى شاعىناۋداندارىنىڭ ءبىرى، ونى رەتكە كەلتىرۋ كەرەك بولاتىن. قالا بيلىگىنىڭ ءبىزدى ەستىپ، الماتىلىقتاردىڭ جايلى ءومىر ءسۇرۋى ءۇشىن بار جاعدايدى جاساپ جاتقانى قۋانتادى. ەندى بىزدە تاماشا بالالار الاڭقايى بار – بالالار قۋانا وينايدى، ءبارى ءقاۋىپسىز ءارى ىڭعايلى ەكەنىنە كوڭىلىم توق. لاۆوچكالار قويىلىپ، جارىق شامدارى ورناتىلدى، اۋلامىز الدەقايدا جايلى بولدى. مۇنداي وزگەرىستەر شىنىمەن دە ءومىرىمىزدى قولايلى ەتە تۇسەدى، – دەدى تۇرعىن ازاماتشا.