اسكەردىڭ تىنىس-تىرشىلىگىنە قاتىستى قوردالانعان سۇراقتار تالقىلاندى.
قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ايگۇل قۇسپان الماتى قالاسىنا جاساعان جۇمىس ساپارىندا ۇلاندىقتاردىڭ جاعدايىمەن تانىستى، دەپ حابارلايدى Almaty-akshamy.kz
قالىق قالاۋلىلارى قاتارىندا حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى ايگۇل قۇسپان مەن «AMANAT» پارتياسى الماتى قالالىق فيليالى ءتوراعاسىنىڭ ورىنباسارى ايگەرىم مۇستافايەۆا بار.
حالىق قالاۋلىسى الدىمەن وڭىرلىك قولباسشىلىق باسقارماسى مەن 5571 اسكەري بولىمىندە بولدى. ماجىلىسمەندى كۇتىپ العان «وڭتۇستىك» وڭىرلىك قولباسشىلىعىنىڭ قولباسشىسىنىڭ مىندەتىن ۋاقىتشا اتقارۋشى پولكوۆنيك بەكايدار قازكەيەۆ قولباسشىلىقتىڭ قىزمەتتىك-جاۋىنگەرلىك جۇمىسىن جانە بولىمدەردىڭ قازىرگى جاعدايى مەن دامۋ پەرسپەكتيۆالارىن، اسكەري قىزمەتشىلەردىڭ ەل قورعاۋداعى اتقارىپ جاتقان قىزمەتتەرى تۋرالى كەڭىنەن تانىستىردى.
كەزدەسۋ بارىسىندا قۇقىقتىق ءتارتىپ اسكەرىنىڭ قىزمەتتىك-جاۋىنگەرلىك مىندەتتەردى ورىنداۋ كەزىندە ەلەۋلى اسەر ەتەتىن ءبىرقاتار ماسەلەلەر ايتىلىپ، ۇلتتىق ۇلان اسكەرىنىڭ تىنىس-تىرشىلىگىنە قاتىستى قوردالانعان سۇراقتار تالقىلاندى.
كەيىن حالىق قالاۋلىسى وڭىرلىك قولباسشىلىققا ىرگەلەس ورنالاسقان 5571 اسكەري ءبولىمىنىڭ جاۋىنگەرلىك ازىرلىگىمەن جانە ولاردىڭ ءۇي-جايلارى، تۇرمىس-تىرشىلىگىمەن جاقىن تانىستى. سونىمەن قاتار، ءبولىمنىڭ اسكەري تەحنيكاسىن، اتىس قارۋى مەن جەكە قۇرامنىڭ ارنايى جابدىقتارىن قاراپ ءوتتى.
ساپار بارىسىندا ءماجلىس دەپۋتاتى قولباسشىلىق تاراپىنان ايتىلعان ماسەلەلەر باستى نازاردا بولاتىنىن، ءار كۇرمەۋلى ماسەلەنىڭ شەشىمىن تابۋىنا كۇش سالاتىنىن جەتكىزدى. سونداي-اق، قۇقىقتىق ءتارتىپ اسكەرىنىڭ جەكە قۇرامىنا الداعى ۋاقىتتا دا اسكەر مەن مەملەكەتتى نىعايتۋعا لايىقتى ۇلەس قوساتىنىنا سەنىم ءبىلدىردى.
ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى جەدەل جانە ارنايى ماقساتتاعى اسكەري بولىمدەرى مەن بولىنىستەرى ىشكى ىستەر ورگاندارىمەن بىرلەسىپ، ەلىمىزدىڭ 6 قالاسىندا قوعامدىق ءتارتىپتى قامتاماسىز ەتەتىنىن اتاپ وتكەن ءجون.
كۇن سايىن 1700-دەن اسا قۇقىقتىق ءتارتىپ اسكەرىنىڭ اسكەري قىزمەتشىلەرى ءىىو بىرگە پاترۋلدىك قىزمەت اتقارۋعا جۇمىلدىرىلادى. اعىمداعى جىلدىڭ وزىندە ۇلتتىق ۇلاندىقتار 4000-نان اسا قۇقىق بۇزۋشىنى ۇستاپ، ىشكى ىستەر ورگاندارىنا جەتكىزدى. قۇقىق بۇزۋشىلىقتىڭ 140-تان استامى قىلمىستىق سيپاتقا يە. ۇلاندىقتار كۇشىمەن 17 سۋىق جانە اتۋ قارۋى، سونداي-اق 0،8 توننا ەسىرتكى زاتتارى تاركىلەنگەن.