ەنجارلىق پەن «ماعان ءبارىبىر» دەگەن ۇستانىم - ەڭ ءقاۋىپتى دەرت...
جەلتوقسان ارداگەرى، اكتەر جانە قازاقستاننىڭ مادەنيەت سالاسىنىڭ ۇزدىگى حالەل باياديلوۆ الدا وتەتىن رەفەرەندۋمعا بارىپ، داۋىس بەرەتىنىن ايتتى، دەپ حابارلايدى Almaty-akshamy.kz.
«وسىدان وتىز جىلدان استام ۋاقىت بۇرىن قازاق ەلى ەگەمەندىككە قول جەتكىزىپ، 1993 جىلى تاۋەلسىز قازاقستاننىڭ العاشقى كونستيتۋسياسى قابىلداندى. بۇعان ءبىز، ارينە، قۋاندىق. ءبىز 1986 جىلدىڭ «ىزعارلى جەلتوقسانىندا» دەموكراتياعا ۇمتىلىپ، توتاليتارلىق جۇيەگە قارسى شىققان العاشقىلار بولدىق. جەلتوقساننان سوڭ بەس جىلدان كەيىن ەلىمىز ەگەمەندىگىن الىپ، تاۋەلسىز ەل بولىپ، ءوز مەملەكەتىمىزدى ۇلىقتادىق. ەگەمەندىگىمىزدىڭ ەلەڭ-الاڭىندا تالاي تۇيىققا تىرەلدىك، تالاي سىننان وتتىك، ەكونوميكالىق-ساياسي قيىندىقتار كوپ بولدى. ەڭ باستىسى، شەكارامىزدى بەلگىلەپ، حالىقارالىق قاۋىمداستىقتىڭ تولىق مۇشەسى بوپ، وتىز جىلدى سوعىسسىز وتكىزدىك. وسى وتىز جىلدا بۇرىنعى وداقتاس رەسپۋبليكالاردىڭ ءبىرتالايىندا قاقتىعىستار ورىن الىپ، گەوگرافياسى قايتا سىزىلعانىن دا بىلەمىز. قازاقستاندى سونداي جاعدايلاردان قۇداي ساقتادى. دەسەك تە، وسى وتىز جىلدا اتا زاڭىمىزعا ءبىرتالاي وزگەرىستەر ەنگىزىلدى. بالكىم سول ۋاقىتتاعى ساياسي احۋالدارعا بايلانىستى بولار، بالكىم مەملەكەت باسقارۋداعى قاجەتتىلىك شىعار، قالايدا ول وزگەرىستەر قاراپايىم حالىقپەن كەلىسىلىپ جاسالعان جوق ەدى...
بۇگىندە حالىقپەن كەڭەسىپ، قوعامعا، مەملەكەتتىك قۇرىلىمعا، ەگەمەن ەلدى باسقارۋعا ءبىرشاما وزگەرىستەر ەنگىزۋ ۋاقىتى كەلگەندەي. ەڭ باستىسى، ءبىر قولعا شوعىرلانعان «سۋپەرپرەزيدەنتتىك» بيلىكتەن باس تارتىپ، ساياساتتاعى وتە جۇقپالى «جەكە باسقا تابىنۋ» سىرقاتىن جۇقتىرۋ قاۋپىنەن بويدى ارىلتۋ كەرەك. اتا زاڭىمىزدان باستاپ، بارلىق مەملەكەتتىك زاڭنامالاردى كۇشەيتىپ، ولاردىڭ بۇلجىتپاي ورىندالۋىن قاداعالاۋ ۋاقىتى كەلدى.
مەملەكەت باسشىسى قاسىم-جومارت توقايەۆ كونستيتۋسياعا تولىقتىرۋلار مەن وزگەرىستەر ەنگىزۋ جونىندە رەفرەندۋم جاريالاپ وتىر. سونىمەن قاتار بۇگىنگى تاڭداعى ەڭ وزەكتى دەگەن وزگەرىستەردى اتا زاڭنان باستاپ وتىر. مەنىڭ تۇسىنىگىمدە قازاقستان حالقى 5 ماۋسىم كۇنى ورتاق ىسكە جۇمىلۋى ءتيىس، رەفەرەندۋمعا قاتىسىپ، ءوز پىكىرىن ءبىلدىرىپ، داۋىس بەرۋى كەرەك. تاۋەلسىز مەملەكەتتىڭ ازاماتى رەتىندە ءوز پوزيسياسىن ءبىلدىرۋى قاجەت. ەنجارلىق پەن «ماعان ءبارىبىر» دەگەن ۇستانىم - ەڭ ءقاۋىپتى دەرت..
ال مەنىڭ ۇستانىمىم بەلگىلى. ول – وڭ وزگەرىستەرگە داۋىس بەرۋ. مەن قازاقستان رەسپۋبليكاسىنىڭ ازاماتى، اكتەر، ق ر مادەنيەت سالاسىنىڭ ۇزدىگى، جەلتوقسان ارداگەرى، پق «جەلتوقسان اقيقاتى» رقب باسقارماسىنىڭ مۇشەسى حالەل وڭعار ۇلى باياديلوۆ مەملەكەت باسشىسى قاسىم-جومارت توقايەۆتىڭ باستاماسىن قولدايمىن جانە جالپىحالىقتىق رەفەرەندۋمعا قاتىسىپ، وڭ وزگەرىستەرگە داۋىس بەرەمىن!»، - دەيدى حالەل باياديلوۆ.