تاعامنىڭ زاتتاڭباسىندا كورسەتىلگەن سيپاتتامالار ءىس جۇزىندە قۇرامىمەن سايكەس كەلمەيتىندىگى انىقتالعان.
رەسەيدەن الىنعان سيىر ەتى كونسەرۆىلەرى مەن جارتىلاي ىستالعان «مۋسۋلمانسكايا» شۇجىعىنان دوڭىز ەتىنىڭ دنق-سى تابىلدى، دەپ حابارلايدى Almaty-akshamy.kz.
زەرتتەۋ ناتيجەلەرى تۋرالى سولتۇستىك قازاقستان وبلىسى بويىنشا ق ر دسم سەبك «ۇلتتىق ساراپتاما ورتالىعى» شجق رمك سىناق زەرتحاناسى حابارلاعان.
«ناۋرىز ايىندا حالىق تۇتىناتىن تاۋارلار ساپاسىنىڭ مونيتورينگى اياسىندا سولتۇستىك قازاقستان وبلىسى بويىنشا سانيتارلىق-ەپيدەميولوگيالىق باقىلاۋ دەپارتامەنتى 38 ەت سىناماسىن ساتىپ الدى. زەرتتەۋ بارىسىندا سيىر كونسەرۆىسىنىڭ ەكى سىناماسى جانە شۇجىق ءونىمىنىڭ ءبىر سىناماسىنان سايكەسسىزدىكتەر انىقتالدى: جارتىلاي ىستالعان «مۋسۋلمانسكايا» شۇجىعى (دايىنداۋشى: جك «پاۆلوۆ ا. س.»، رەسەي، باشقۇرتستان رەسپۋبليكاسى)؛ ستەريلدەنگەن كەسەك ەتتى كونسەرۆىلەر «جوعارى سۇرىپتى بۇقتىرىلعان سيىر ەتى» (دايىنداۋشى: «ستاندارت» كۋرگانسكيي مياسوكومبينات» جشق، رەسەي، قورعان ق.)؛ «جوعارى سۇرىپتاعى بۇقتىرىلعان سيىر ەتى» ستەريلدەنگەن كەسەك ەتتى كونسەرۆىلەر (دايىنداۋشى: «ورەلپرودۋكت» اق، رەسەي، ورلوۆسك وبلىسى). سونداي-اق، ەتقۇرامدى، تارتىلعان ەت، ستەريلدەنگەن كونسەرۆىلەر دە بار. «تۇسكى استىق دوڭىز ەتى» تاۋىق-دنق-سى تابىلدى (ءوندىرۋشى: رەسەي، ماسكەۋ وبلىسى، «سەلياتينو» ەت وڭدەۋ زاۋىتى)»،- دەپ جازىلعان سانيتارلىق-ەپيدەميولوگيالىق باقىلاۋ كوميتەتى بەرگەن اقپاراتتا.
انىقتالعان بۇزۋشىلىقتارعا بايلانىستى بۇل ونىمدەر سايكەس كەلمەيتىن ونىمدەر تىزىلىمىنە ەنگىزىلگەن. ۇسو فيليالى ماماندارىنىڭ ايتۋىنشا، وندىرۋشىلەر تاماق ونىمدەرىن تاڭبالاۋ بويىنشا دا ءبىرقاتار بۇزۋشىلىققا جول بەرگەن.