ۇلگىلىك قۇجاتتاردىڭ تىزبەسى دە ازايماق.
بۇل تۋرالى پرەزيدەنتتىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعىندا ايتىلعان، دەپ حابارلايدى Almaty-akshamy.kz
2022 جىلدىڭ اياعىنا دەيىن مەملەكەتتىك ورگانداردىڭ كەڭسە قاعازىنا جانە ونىمەن بايلانىستى تاۋارلارعا ارنالعان بيۋدجەت شىعىستارى ءۇش ەسەگە قىسقارتىلادى.
«كەڭسە قاعازىنا جانە ونىمەن بايلانىستى تاۋارلارعا ارنالعان بيۋدجەت شىعىستارىن ءۇش ەسەگە قىسقارتۋدى قامتاماسىز ەتسىن»، - دەلىنگەن پرەزيدەنت جارلىعىندا.
جارلىق بويىنشا، مەملەكەتتىك اقپاراتتاندىرۋ وبەكتىلەرىندە قامتىلعان ازاماتتار مەن زاڭدى تۇلعالار تۋرالى مالىمەتتەردى تۇزەتۋدىڭ وڭايلاتىلعان تەتىگى ەنگىزىلمەك. سونداي-اق، مەملەكەتتىك جانە مەملەكەتتىك ەمەس ۇيىمداردىڭ قىزمەتىندە جاسالاتىن ۇلگىلىك قۇجاتتاردىڭ تىزبەسىن قىسقارادى. بۇل قۇجاتتاردىڭ ءارقايسىسىن قانشا مەرزىم بويى ساقتاۋ كەرەكتىگى كورسەتىلۋى كەرەك.
«نورماتيۆتىك قۇقىقتىق اكتىلەر جوبالارىنىڭ «اشىق نقا» ينتەرنەت-پورتالىندا ورنالاستىرىلعانى تۋرالى حابارلامالاردى قازاقستان رەسپۋبليكاسىنىڭ ۇلتتىق كاسىپكەرلەر پالاتاسىنا، جەكە كاسىپكەرلىك سۋبەكتىلەرىنىڭ اككرەديتتەلگەن بىرلەستىكتەرىنە، قوعامدىق كەڭەستەرگە جىبەرۋ ءراسىمىنىڭ اۆتوماتتاندىرىلۋىن قامتاماسىز ەتسىن»، - دەپ جازىلعان اتالمىش قۇجاتتا.