الماتىدا وسى اتاۋمەن تۇرمىستىق زورلىق-زومبىلىققا قارسى ميتينگ ءوتتى.
الماتىدا "جاڭا ادامدار" جاستار قوزعالىسىنىڭ ۇيىمداستىرۋىمەن "حايۋاندار الەمىنە جوق دە" اتتى تۇرمىستىق زورلىق-زومبىلىققا قارسى رۇقسات ەتىلگەن ميتينگ ءوتتى، دەپ حابارلايدى Almaty-akshamy.kz
بۇگىن "سارىارقا" كينوتەاترىنىڭ ارتىنداعى ساياباققا 500-گە جۋىق ادام جينالدى. ميتينگكە قاتىسۋشىلاردىڭ بارلىعىنا كىرەبەرىستە ارنايى سارى-كۇلگىن مويىن وراعىشتار تاراتىلدى.
"جاڭا ادامدار" قوزعالىسىنىڭ جەتەكشىسى اسەل بادەنوۆا تىلشىمىزگە بەيبىت ميتينگ وتكىزۋگە رۇقسات سۇراپ بىرنەشە رەت ءوتىنىش بەرگەنىن ايتتى.
"ءبىزدىڭ ميتينگتىڭ باستى تاقىرىبى – "حايۋاندار الەمىنە جوق دە". ءبىز بۇل تقجىرىمدامانى ادەيى تاڭدادىق، ويتكەنى بىرەۋدى ءولتىرىپ، وعان قول كوتەرەتىن ادامدار جانۋارلار سياقتى، تۇيسىكپەن ويلايدى. ءبىراق بۇل جانۋارلاردىڭ تىكەلەي قاتىستى ەمەس. تۇيسىكپەن ويلايتىن ادامداردىڭ حايۋاننان ايىرماشىلىعى جوق ەكەنىن ايتىپ وتىرمىز. ءبىراق ادامدار كوبىرەك ويلانىپ، ءبىر-بىرىن سىيلاۋى كەرەك، ويتكەنى ءبىزدى حايۋاننان ەرەكشەلەندىرەتىن دە وسى"، – دەيدى اسەل بادەنوۆا.
ول بۇگىن ميتينگكە قاتىسۋشىلار تالاپ قويۋ ءۇشىن ەمەس، قوعامنىڭ نازارىن تاعى ءبىر رەت تۇرمىستىق زورلىق-زومبىلىق ماسەلەسىنە اۋدارۋ ءۇشىن كەلگەنىن اتاپ ءوتتى.
"ءبىز بۇل جەردە ەشتەڭە تالاپ ەتىپ وتىرعان جوقپىز. ءبىز ادامداردى وزىنەن باستاۋ كەرەك ەكەنى، زورلىق-زومبىلىق تاريحىنا نۇكتە قويۋيا كەرەك ەكەنى جونىندە ويلانۋعا شاقىرامىز. ءوزىمىز وزگەرە باستاعاندا، ءبىز ءبىر-بىرىمىزدى قۇرمەتتەي باستايمىز"، – دەدى ول.
ميتينگىگە مارقۇم سالتانات نۇكەنوۆانىڭ اعاسى ايتبەك امانگەلدى دە قاتىستى. ول ساحناعا قايتىس بولعان قارىنداسىنىڭ سۋرەتىن الا شىقتى.
"بۇل – مەنىڭ قارىنداسىم سالتانات. سوڭعى ەكى اپتادا ءبىزدىڭ ءومىرىمىز تۇبەگەيلى وزگەردى. مەن قانشاما قايعىنى، قورقىنىشتى كوردىم، ءقازىر قيىن جاعدايدا جۇرگەن قانشاما قىزدىڭ اڭگىمەسىن تىڭدادىم. باسىمىزداعى قايعى-قاسىرەتتى ەشقاشان ۇمىتا المايمىن. وكىنىشكە ءواراي، ءبىزدىڭ الەم وسىنداي. سوندىقتان ءوز قولىمىزعا الۋىمىز كەرەك، جاڭا زاڭداردى قالىپتاستىرۋدا قوعام مەن حالىقتى باقىلاۋعا الۋىمىز كەرەك. اسىرەسە، تۇرمىستىق زورلىق-زومبىلىق قارسى كۇرەس تۇرعىسىنان"، – دەدى ايتبەك امانگەلدى.
ونىڭ ايتۋىنشا، ەڭ الدىمەن اركىم وزىنەن باستاۋى كەرەك – تۇرمىستىق زورلىق-زومبىلىق فاكتىلەرى تۋرالى اشىق ايتۋى، كومەك سۇراۋى كەرەك. "ءبارىمىز ءۇنسىز وتىرساق، ەشتەڭە وزگەرمەيدى".
"كەشكە قاراي قالانى ارالاپ ءجۇرىپ، ۇيلەردى قاراپ، ءقازىر قانشا پاتەردە ايەلدەرگە قاتىستى زورلىق-زومبىلىق بولىپ جاتقانىن ەلەستەتەمىن، ءبىراق ءبىز ونى بىلمەيمىز. كوبىنە بىلە تۇرا، جاي عانا ءوتىپ كەتەمىز. ءار كەز مۇقتاج جاندارعا كومەكتەسپەۋ ارقىلى ءبىز جانىمىزدىڭ ءبىر بولىگىنەن ايىرىلىپ قالامىز"، – دەدى ول.
"وتباسىممەن بۇل جولدى ءوزىمىز تاڭداعان جوقپىز. ءبىز كوپ نارسەدەن ايىرىلدىق، قايعى-قاسىرەت شەكتىك. ەڭ باستىسى، بۇل كۇيدە ءبىزدىڭ باسىمىزدان ءوتىپ جاتقان جايتتى ەشكىم ەشقاشان سەزىنبەسە ەكەن دەيمىز. ءبىر-بىرىمىزدى جەرگە قاراتپاي، كومەكتەسەيىك"، - دەپ تۇيىندەدى ءسوزىن ايبەك امانگەلدى.
ميتينگ سوڭىندا قاتىسۋشىلار تورداعى مانەكەندەرگە بەلگىلى تۇرمىستىق زورلىق-زومبىلىق جاعدايلارى جازىلعان پلاكاتتاردى ءىلىپ قويدى.