اقجول مەيىربەكوۆتىڭ 73 جاسقا قاراعان شاعىندا ومىردەن وتكەنىن كەشە حابارلاعانبىز.
ايدا بالايەۆا «دوس-مۇقاسان» ءانسامبلىنىڭ ءسوليسى اقجول مەيىربەكوۆتىڭ جاقىندارىنا كوڭىل ايتتى، دەپ حابارلايدى Almaty-akshamy.kz
«قازاق ءان ونەرىنىڭ جارىق جۇلدىزى، مادەنيەت سالاسىنىڭ مايتالمانى اقجول مەيىربەكوۆ اعامىزدىڭ دۇنيەدەن وتكەنى جايلى قارالى حابار جەتتى. اردا ازامات قازاق ەستراداسىنىڭ قالىپتاسۋى جولىندا ايشىقتى ءىز قالدىرىپ، تالاي بۋىننىڭ تالعامىن قالىپتاستىردى. سوندىقتان تانىمال تۇلعانىڭ قازاسى قالىڭ قازاقتىڭ قابىرعاسىن قايىستىرعانى انىق»، - دەپ جازدى ول ءوزىنىڭ فب پاراقشاسىندا.
اقجول مەيىربەكوۆ ونەر كەڭىستىگىندە وزىندىك جولىن قالىپتاستىرىپ، ايگىلى «دوس-مۇقاسان» انسامبلىمەن بىرگە ەلدىڭ ىستىق ىقىلاسىنا بولەنىپ، سوڭىندا وشپەس ءىز قالدىردى. ونىڭ جارقىن بەينەسى قالىڭ جۇرتشىلىقتىڭ جادىندا ماڭگى ساقتالارى انىق.
«مارقۇمنىڭ اعايىن-تۋىسى، جاقىندارىنا قايعىرا كوڭىل ايتامىن. جاتقان جەرى جايلى، توپىراعى تورقا بولسىن»! – دەدى مادەنيەت ءمينيسترى.