قىز ساۋساعىن توردان وتكىزگەن
وسكەمەندەگى حايۋاناتتار باعىندا قاسقىر بالانى تىستەپ الدى. پوليسەيلەر زارداپ شەككەن قىزدىڭ اتا-اناسىنا سوتقا جۇگىنۋگە كەڭەس بەردى، دەپ حابارلايدى Almaty-akshamy.kz Tengrinews.kz-كە سىلتەمە جاساپ.
جابىرلەنۋشىنىڭ اتا-اناسى پوليسياعا حابارلاسقان. ولار حايۋاناتتار باعىنداعى قاۋىپسىزدىك شارالارىن كۇشەيتۋ كەرەك دەپ ەسەپتەيدى.
"وسكەمەن قالاسىنىڭ سول جاعالاۋ پوليسيا بولىمىنە 34 جاستاعى ايەل كامەلەتكە تولماعان بالاسىن قاسقىر تىستەپ العان حايۋاناتتار باعىنىڭ قىزمەتكەرلەرىنە شاعىمى بارىن ايتىپ، ارىزداندى"، - دەلىنگەن شقو پوليسيا دەپارتامەنتىنىڭ باسپا ءسوز قىزمەتى تاراتقان مالىمەتتە.
پوليسيا مالىمەتىنشە، 11 ناۋرىزدا كامەلەتكە تولماعان بالا حايۋاناتتار باعى ورنالاسقان قالالىق ساياباقتا اناسىمەن بىرگە سەرۋەندەپ ءجۇرىپ، قاسقىرلار تۇرعان قورشاۋعا جاقىنداپ جىرتقىشتى سيپاماق بولعان. قىز ساۋساعىن توردان وتكىزگەندە قاسقىر تىستەپ العان.
"ايتا كەتەتىن جايت، ساياباقتىڭ ىشكى ەرەجەسى بويىنشا، مۇنداي وقيعالاردى بولدىرماۋ ءۇشىن كەيبىر ارەكەتتەرگە تىيىم سالۋ تۋرالى ەسكەرتۋلەرى بار الدىن الا ازىرلەنگەن ماڭدايشالار ىلىنگەن: ونىڭ ىشىندە جانۋاردىڭ تورىنا شىقپاۋ، ونىڭ تورىنا قول كىرگىزبەۋ بار. وسى ەرەجەلەردى ساقتاماۋ سالدارىنان وسىنداي وقيعا بولعان"، - دەدى شقو پد وكىلدەرى.
پوليسەيلەر بۇل جاعدايدا قانداي دا ءبىر اكىمشىلىك نەمەسە قىلمىستىق قۇقىقبۇزۋشىلىق قۇرامى بايقالمايتىنىن اتاپ ءوتتى.
"وسىعان بايلانىستى ارىزدانۋشىعا سوتقا جەكە جۇگىنۋ ۇسىنىلدى"، - دەدى پوليسيا وكىلدەرى.