الداعى ۋاقىتتا تاعى ءبىر 60 پاتەرلى ءۇي پايدالانۋعا بەرىلەدى
جەتىسۋ وبلىسىنىڭ قارابۇلاق اۋىلىندا مەملەكەتتىك باعدارلامامەن سالىنعان 60 پاتەرلى ءۇي پايدالانۋعا بەرىلدى، دەپ حابارلايدى Almaty-akshamy.kz Qazaqstan.tv-گە سىلتەمە جاساپ.
باسپانالى بولعانداردىڭ بارلىعى - ءۇي كەزەگىندە تۇرعان ازاماتتار. ولاردىڭ قاتارىندا ەڭبەك ارداگەرلەرى، مۇمكىندىگى شەكتەۋلى جاندار، كوپ بالالى انالار بار.
ەسكەلدى اۋدانىنىڭ ورتالىعىندا بىرنەشە جىلدان بەرى كوپ قاباتتى ءۇي قۇرىلىسى جۇرمەي، باسپاناعا مۇقتاجدار سانى 1300-گە جەتكەن. ەلدى مەكەندە الداعى ۋاقىتتا تاعى ءبىر 60 پاتەرلى ءۇي پايدالانۋعا بەرىلەدى. مۇنان بولەك، 8 كوپ قاباتتى ءۇي سالۋ ءۇشىن ينجەنەرلىك-ينفروقۇرىلىم جۇيەلەرى تارتىلىپ جاتىر.
«وتە قۋانىشتىمىز. 13 جىلدان استام ۋاقىت تۇرعىن ءۇي كەزەگىندە تۇردىق. شۇكىر، بۇگىن وسىنداي قۋانىش بۇيىرىپ، قونىس تويىن تويلاپ جاتىرمىز. ۇلىستىڭ ۇلى كۇنى - ناۋرىز مەرەكەسىمەن شىن جۇرەكتەن قۇتتىقتايمىز. ءار شاڭىراقتا وسىنداي مەرەكە، بەرەكە بولسىن!» - دەيدى اۋىل تۇرعىنى ۇلجان بوتپايەۆا.