عىلىمي قىزمەت قاشاندا جانكەشتى جۇمىس. جاساعان ازدى-كوپتى عۇمىرىندا عىلىممەن شۇعىلدانىپ، وعان جاستاردى باۋلۋمەن شاكىرت تاربيەلەپ، باياندى تابىستارعا كەنەلەر ازاماتتار قاتارى نەكەن-ساياق. تاعدىر سىناعىنىڭ وتكەلدەرىندە تاڭداعان جولىنان تايماي، سىن ساعاتتاردا شىڭدالىپ، قىزمەتىنە بەرىلىپ، جان-تانىمەن اقتارىلا اتقارۋ كەمەل تۇلعالاردىڭ عانا قولىنان كەلەدى. سونداي ابىز جاننان تالىم-تاربيە الۋ باقىتى بۇيىرىپ، ۇيرەتكەن تاعىلىمدارى ومىرلىك تەمىرقازىق بولار، ونەگەلى وسيەتتەرى ەسكە ورالىپ وتىراتىن قۇرمەتتى ۇستازىمىز، تاماشا عالىم-ەنەرگەتيك – توحتيباكييەۆ كارمەل كاميل ۇلى 2025 جىلعى 22 مامىردا ۇزاققا سوزىلعان ناۋقاستان قايتىس بولدى.
تاپجىلماستان 24 جىل «ەنەرگوجۇيەجوباسىندا» جۇمىس جاساپ، مول تاجىريبە جيعان عالىم اعامىز، 1998 جىلى الماتى ەنەرگەتيكا جانە بايلانىس ينستيتۋتىنا «ەلەكتر جۇيەلەرى مەن جەلىلەرى» كافەدراسىنىڭ دوسەنتى لاۋازىمىنا تاعايىندالدى. 2001 جىلى وعان اكادەميالىق دوسەنت اتاعى بەرىلدى. 2023 جىلى ۇزاق جىلدارعى عىلىمي-پەداگوگيكالىق ەڭبەگى باعالانىپ، عۇماربەك داۋكەيەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىنىڭ (اەجبۋ) ەڭبەگى سىڭگەن پروفەسسورى قۇرمەتتى اتاعى بەرىلدى.
كارمەل كاميل ۇلى ءوز ىسىنە بەرىلگەن، جاڭالىققا جانى قۇشتار عالىم ءارى ەلىمىزدىڭ ەلەكتر ەنەرگەتيكاسى سالاسىنىڭ نىساندارىنا ەنگىزىلگەن ءبىرقاتار عىلىمي جانە يننوۆاسيالىق شەشىمدەردى ازىرلەگەن ءوز ءىسىنىڭ بىلىكتى تۇلعاسى ەدى. 70-تەن استام عىلىمي جوبالاردىڭ اۆتورى اتاندى. ولاردىڭ بارلىعى قازاقستاننىڭ «سيفرلى قازاقستان» مەملەكەتتىك دامۋ باعدارلاماسىنا ەنگىزىلدى.سونداي-اق، كارمەل كاميل ۇلى قازاقستان بەج مەن ورتالىق ازيا بەج-نىڭ 2030 جىلعا دەيىنگى بىرلەسكەن دامۋ تۇجىرىمداماسىن ازىرلەۋدىڭ اۆتورى بولدى. بۇل زەرتتەۋ قازاقستان، وزبەكستان، قىرعىزستان جانە تاجىكستان تاۋەلسىزدىك العاننان كەيىن العاش رەت ورىندالدى.
كارمەل اعامىز عىلىمي قىزمەتىندە قازاقستاننىڭ وڭىرلىك ەلەكتر جەلىلىك كومپانيالارىن (وەك) نازاردان تىس قالدىرعان جوق. ەلەكتر قۋاتىنىڭ جوعالتۋىن تومەندەتۋ بويىنشا ازىرلەگەن جوبالارى قولدانىسقا ءساتتى ەنگىزىلدى. تابيعي مونوپوليالار سالاسىندا كوپتەگەن جىلدار بويى ەلەكتر قۋاتىن جوعالتۋدىڭ نورماتيۆتىك دەڭگەيىن باعالاۋ بويىنشا ساراپشى رەتىندە قىزمەت ەتتى. عىلىم جانە جوعارى ءبىلىم مينيسترلىگىنىڭ تاپسىرىسى بويىنشا ءبىرقاتار ماڭىزدى عىلىمي جوبالاردى ورىندادى. ءححى عاسىردىڭ باسىندا، ەلدىڭ ەلەكتر ەنەرگەتيكاسى سالاسىن قايتا فورماتتاۋ قاجەتتىلىگى تۋىنداعان كەزدە، قازاقستان رەسپۋبليكاسىنىڭ ەلەكتر ەنەرگەتيكاسىنداعى نارىقتىق قاتىناستاردى ودان ءارى دامىتۋ تۇجىرىمداماسىن ازىرلەۋگە قاتىستى. ۋنيۆەرسيتەت رەكتورى، ت.ع.ك.، پروفەسسور عۇماربەك جۇسىپبەك ۇلى داۋكەيەۆتىڭ جەتەكشىلىگىمەن جانە ت.ع.ك.، پروفەسسور الماس اۋسىدىق ۇلى جاكۋپوۆپەن بىرلەسىپ ءتيىمدى تاريفتىك ساياساتتى قالىپتاستىرۋ جونىندەگى عىلىمي-زەرتتەۋ جوبالارىنا قاتىستى.
عىلىمي جوبالاردى ورىنداۋ كەزىندە كارمەل كاميل ۇلى ءارقاشان ءوز جۇمىسى ءۇشىن جاۋاپكەرشىلىك الىپ، جوبانىڭ عىلىمي جەتەكشىسى نەمەسە باس ينجەنەرى رەتىندە قىزمەت ەتتى. ەڭبەكتەرى باعالانىپ، «قازاقستاننىڭ ەڭبەك سىڭىرگەن ەنەرگەتيگى» جانە «تمد-عا قاتىسۋشى مەملەكەتتەردىڭ ەلەكتر ەنەرگەتيكاسىن دامىتۋعا قوسقان ەلەۋلى ۇلەسى ءۇشىن تمد ەلەكتر ەنەرگەتيكالىق كەڭەسىنىڭ قۇرمەتتى ەنەرگەتيگى»، سونداي-اق ەلدىڭ ەنەرگەتيكالىق جۇيەسىنىڭ يگىلىگى جولىنداعى كوپ جىلعى جۇمىسى ءۇشىن «ەڭبەك ارداگەرى» اتاندى.
بۇگىندە قازاقستاننىڭ ەنەرگەتيكا سالاسىنداجەمىستى جۇمىس جاساپ جۇرگەن جۇزدەگەن شاكىرتتەرى – ءوز ءىسىنىڭ ماماندارى، ماگيسترانتتارى مەن دوكتورانتتارى كارمەل كاميل ۇلىنىڭ ۇستازدىقەڭبەگىن ريزاشىلىقپەن ەسكە الادى.
ۇستازىمىزدىڭ وتباسىنا، تۋىس، جورا-جولداستارىنا شىن جۇرەكتەن كوڭىل ايتامىز!ءارقاشان اعامىزدىڭ ادامشىلىعىن، عىلىمعا ادالدىعىن ۇلگى تۇتامىز.
قازاقستان رەسپۋبليكاسىنىڭ ەنەرگەتيكا كەشەنىن دامىتۋعا بار كۇش-جىگەرىن، ءومىرىن سارپ ەتكەن كورنەكتى عالىم، سۇڭعىلا ۇستاز، ەلجاندى ازامات كارمەل كاميل ۇلى توحتيباكييەۆتىڭ اسىل بەينەسى ءبىزدىڭ جادىمىزدا ماڭگىگە ساقتالادى.
شاكىرتتەرى اتىنان:
د.ج.دجەكسەنبينوۆ،
«كريستالل مەنەدجمەنت» اق ەلەكتر قۋاتىن ساتۋ جونىندەگى مەنەدجەرى،
ا.ا.ساۋحيموۆ،
PhD – «KEGOC» اق ۇەج دامىتۋ جونىندەگى باسقارۋشى ديرەكتورى،
ا.ت.بەكتيميروۆ،
«اەجبۋ» كەاق PhD اعا وقىتۋشىسى،
ا.يۋ.گولۋبينا،
«سمنۋ-70» اق ينجەنەر-ەكونوميسى (رف).