المالى اۋدانىنا جاساعان جۇمىس ساپارى اياسىندا الماتى اكىمى دارحان ساتىبالدى مۇحتار اۋەزوۆ اتىنداعى قازاق ۇلتتىق دراما تەاترىندا بولدى. قازىرگى ۋاقىتتا مۇندا كەڭ اۋقىمدى قايتا جاڭعىرتۋ جۇمىستارى جۇرگىزىلىپ جاتىر.
تەاتردى جاڭارتۋ قاجەتتىلىگى ونىڭ تەحنيكالىق جاي-كۇيىنە بايلانىستى تۋىنداعان. كەيبىر قۇرىلىمدار سەيسميكالىق قاۋىپسىزدىك تالاپتارىنا ساي كەلمەگەن، ينجەنەرلىك جۇيەلەر تولىق ەسكىرگەن، ال عيماراتتىڭ قاسبەتى مەن ىشكى كەڭىستىكتەرى ابدەن توزعان.
مەردىگەر كومپانيا وكىلدەرىنىڭ مالىمەتىنشە، جوبانىڭ باستى ۇستانىمى – تەاتردىڭ تاريحي كەلبەتىن ساقتاۋ. وسىعان بايلانىستى سىرتقى قاسبەت قايتا جاسالىپ، ىشكى ارلەۋ جۇمىستارى – اسپاشامدار، بارەلەفتەر، ەدەن جابىنى قالپىنا كەلتىرىلەدى.
بۇعان قوسا، ساحنالىق جابدىقتار جاڭارتىلىپ، تەحنيكالىق بولمەلەر زامان تالابىنا ساي جابدىقتالادى. تەاتر ىشىندە ارتيستەر مەن قىزمەتكەرلەرگە ارنالعان جاڭا دايىندىق زالدارى، جۇمىس ورىندارى مەن قويما قاراستىرىلادى. قايتا جاڭعىرتۋ جۇمىستارىن تەاتردىڭ 100 جىلدىق مەرەيتويىنا وراي، 2026 جىلعا دەيىن اياقتاۋ جوسپارلانىپ وتىر. بۇل ونەر ورداسى ەلىمىز ءۇشىن ماڭىزدى مادەني نىسان.
دارحان ساتىبالدى تەاتر ماڭىنداعى اۋماقتى كوركەيتۋ جوباسىمەن دە تانىستى. جوبا ۇلتتىق ناقىشتى ساقتاۋعا، مۋزىكالىق اسپاپ بەينەسىندەگى شاعىن ساۋلەت نىساندارىن ورناتۋعا جانە ساندىك الما اعاشتارىن ەگۋگە باعىتتالعان.