الماتىدا ساتبايەۆ ۋنيۆەرسيتەتىنىڭ مەرەيتويى مەن قانىش ساتبايەۆتىڭ 125 جىلدىعىنا ارنالعان فورۋم باستالدى
ساتبايەۆ ۋنيۆەرسيتەتىنىڭ 90 جىلدىعى: الماتىدا ءتورتىنشى ونەركاسىپتىك ريەۆوليۋسيانىڭ سىن-قاتەرلەرىنە ارنالعان فورۋم ءوتىپ جاتىر، دەپ حابارلايدى aqshamnews.kz
الماتى قالاسىنىڭ اكىمى ەربولات دوسايەۆ ساتبايەۆ ۋنيۆەرسيتەتىنىڭ 90 جىلدىعى مەن قازاقستانداعى گەولوگيالىق مەكتەپتىڭ نەگىزىن قالاۋشى جانە ۇلتتىق عىلىم اكادەمياسىنىڭ العاشقى پرەزيدەنتى قانىش ساتبايەۆتىڭ 125 جىلدىعىنا ارنالعان «ەۋرازيانىڭ عىلىمي-ينجەنەرلىك قاۋىمداستىعىنىڭ الدىنداعى ءتورتىنشى ونەركاسىپتىك ريەۆوليۋسيانىڭ سىن-قاتەرلەرى»اتتى حالىقارالىق عىلىمي فورۋمنىڭ اشىلۋ سالتاناتىنا قاتىستى.
فورۋمنىڭ اشىلۋىندا قالا اكىمى قازاقستان پرەزيدەنتى قاسىم-جومارت توقايەۆتىڭ قۇتتىقتاۋ جەدەلحاتىن وقىپ، ۋنيۆەرسيتەت ۇجىمىن مەرەيتويمەن قۇتتىقتادى.
فورۋم 11-15 قاراشا ارالىعىندا الماتى قالاسىندا وتەدى. وعان 22 ەلدەن 200 ۇيىم مەن كاسىپورىننىڭ، قازاقستاندىق جانە شەتەلدىك جوعارى وقۋ ورىندارىنىڭ، ەلشىلىكتەر مەن كونسۋلدىقتاردىڭ وكىلدەرى قاتىسادى.
باعدارلاما اياسىندا STROYTECH ينجەنەرلىك ورتالىعى مەن تەحنوپاركىنىڭ، Hyundai Engineering زەرتتەۋ ورتالىعىنىڭ اشىلۋى، ماسساچۋسەتس تەحنولوگيالىق ينستيتۋتىنىڭ ستاندارتتارى بويىنشا قۇرىلعان Customized FabLab تانىستىرىلىمى وتەدى. فورۋم بارىسىندا پلەنارلىق وتىرىس، تەحنولوگيالاردى ترانسفەرلەۋ، مەملەكەت، عىلىم جانە بيزنەستىڭ ءوزارا ارەكەتتەستىگى، جاس عالىمداردىڭ مانساپتىق ءوسۋى جونىندە پانەلدىك سەسسيالار ۇيىمداستىرىلادى.
جاقىندا ساتبايەۆ ۋنيۆەرسيتەتى ەكى تاريحي جەتىستىككە قول جەتكىزدى. ۋنيۆەرسيتەت QS Stars سىيلىعىنا يە بولىپ، حالىقارالىق سەرىكتەستەرمەن ءبىلىم بەرۋ باعدارلامالارىنىڭ جوعارى دەڭگەيىن راستادى. سونىمەن قاتار، ساتبايەۆ اتىنداعى قازۇتزۋ ازياداعى ۇزدىك 100 ۋنيۆەرسيتەتتىڭ قاتارىنا ەنىپ، 4000 ازيالىق جوعارى وقۋ ورنىنىڭ اراسىندا پوزيسياسىن نىعايتتى. ول Shanghai University، Pusan National University سياقتى ۋنيۆەرسيتەتتەرمەن قاتار تۇرىپ، University of Macau، Singapore Management University سەكىلدى بەدەلدى ازيالىق جوعارى وقۋ ورىندارىن باسىپ وزدى.
