الماتى كارديولوگيالىق ورتالىعىندا سوزىلمالى جالپى وككليۋزيانى قايتا وزەكتەۋ جۇرگىزىلدى
الماتى قالالىق كارديولوگيالىق ورتالىعىندا "سوزىلمالى جالپى وككليۋزيانى قايتا وزەكتەۋ: زاماناۋي تەحنيكا جانە دارىلىك جابىنى بار باللونداردىڭ ءرولى" تاقىرىبىندا بىرەگەي شەبەرلىك سىنىبى ءوتتى.
ءىس-شارانى اۆستريانىڭ ينتەرۆەنسيالىق كارديولوگتارىنىڭ ءبىرى، دوكتور اۋرەل توما، PhD، دوناۋشتادت كلينيكاسى كارديولوگيا دەپارتامەنتىنىڭ كاتەتەريزاسيالىق زەرتحاناسىنىڭ جەتەكشىسى جانە ينتەرۆەنسيالىق حيرۋرگيا ءبولىمىنىڭ مەڭگەرۋشىسى ورازبەك ساحوۆ جۇرگىزدى.
سوزىلمالى جالپى وككليۋزيالار (CجO) - اتەروسكلەروزدىڭ اۋىر تۇرىندە پايدا بولاتىن كورونارلىق ارتەريانىڭ تولىق جانە ۇزاق جابىلۋى.
بۇل اۋرۋ - ينتەرۆەنسيالىق كارديولوگياداعى ەڭ قيىن ماسەلەنىڭ ءبىرى.
قايتا وزەكتەۋ پروسەدۋرالارى تەك جوعارى بىلىكتى ماماندى عانا ەمەس، سونىمەن قاتار تامىردىڭ تار نەمەسە قيسىق ايماعىندا جۇمىس ىستەۋ ءۇشىن جوعارى وتكىزگىشتىگى مەن يكەمدىلىگى بار مامانداندىرىلعان جابدىقتى قولدانۋدى قاجەت ەتەدى.
دوكتور اۋرەل توما ماستەر-كلاسس قاتىسۋشىلارىنا ەمدەۋدىڭ تيىمدىلىگى مەن قاۋىپسىزدىگىن ارتتىرۋعا مۇمكىندىك بەرەتىن زاماناۋي قايتا وزەكتەۋ ادىستەرىن ۇسىندى. ال ەمدەلۋشىلەردىڭ بۇل وپەراسيا ءتۇرىن مىندەتتى الەۋمەتتىك مەديسينالىق ساقتاندىرۋ پاكەتىندە الۋعا مۇمكىندىگى بار.
ول ارتەريانىڭ قايتا تارىلۋىن بولدىرماۋعا جانە قايتالانۋ ءقاۋپىن ازايتۋعا كومەكتەسەتىن دارى-دارمەكپەن قاپتالعان باللوندى قولدانۋعا باسا نازار اۋداردى.
دارىگەردىڭ ايتۋىنشا، مۇنداي باللون تۇراقتى جانە ۇزاق مەرزىمدى ناتيجە بەرە وتىرىپ، CجO ەمدەۋدە ماڭىزدى ءرول اتقارادى.
ءىس-شارا اياسىندا ءۇش وتا جۇرگىزىلدى، وندا قاتىسۋشىلار كۇردەلى ارالاسۋ تەحنيكاسىن باقىلاي الدى.
ءاربىر وتا ارتەريالىق زاقىمدانۋ قۇرىلىمىنا جانە ناۋقاستىڭ جاعدايىنا بايلانىستى قولدانۋعا بولاتىن ءتۇرلى ءتاسىل مەن تاكتيكانى كورسەتتى.
ورازبەك ساحوۆتىڭ ايتۋىنشا، دارى-دارمەكپەن قاپتالعان باللوندار سوزىلمالى وككليۋزيانى ەمدەۋدىڭ ماڭىزدى بولىگىنە اينالدى.
"ارنايى پرەپاراتپەن قاپتالعان باللوندار جاسۋشالاردىڭ ءوسۋىن بولدىرماۋعا كومەكتەسەدى، بۇل ءوز كەزەگىندە تامىردىڭ قايتالاما تارىلۋ ءقاۋپىن ازايتۋعا كومەكتەسەدى. وسى ءتاسىلدىڭ ارقاسىندا قان اعىمىنىڭ ۇزاق مەرزىمدى جاقسارۋىنا قول جەتكىزۋگە جانە قايتالانۋ ىقتيمالدىعىن ازايتۋعا بولادى"،- دەپ اتاپ ءوتتى ول.
مۇنداي ماستەر-كلاستار حالىقارالىق ىنتىماقتاستىقتى نىعايتىپ قانا قويماي، سونىمەن قاتار قالالىق كارديولوگيالىق ورتالىقتىڭ ماماندارىنا پاسيەنتتەردىڭ ءومىرىن ساقتاپ قالۋعا جانە ولاردىڭ ءومىر ءسۇرۋ ساپاسىن جاقسارتۋعا باعىتتالعان جاڭا ءبىلىمدى تاجىريبەدە قولدانۋعا مۇمكىندىك بەرەدى.