«عىلىم تۋرالى» زاڭعا وزگەرىستەر ەنگىزىلەدى

ەلىمىزدە عالىمداردىڭ مارتەبەسى كوتەرىلەدى.

بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى Almaty-akshamy.kz.

«زاڭدا قانداي قىزىق وزگەرىستەر بولىپ جاتىر؟ ءبىز عالىمداردىڭ مارتەبەسىن كوتەرۋ ماقساتىندا بايىپتى قادامدار جاسادىق. ەلدە عالىمداردىڭ سانى ايتارلىقتاي ازايدى، ويتكەنى مانساپتىق تارتىمدىلىق دەڭگەيى وتە تومەن. عىلىمي-زەرتتەۋ ينستيتۋتتارى قىزمەتكەرلەرىنىڭ ورتاشا جاسى – 59 جاس، ال عىلىم اكادەمياسى مۇشەلەرىنىڭ ورتاشا جاسى – 69 جاس»، - دەدى ساياسات نۇربەك ۆەدومستۆونىڭ كەڭەيتىلگەن وتىرىسىنان كەيىن جۋرناليستەردىڭ ساۋالدارىنا جاۋاپ بەرە وتىرىپ.

جوسپارلانعان شارالاردى ايتا كەلە، مينيستر عىلىمي مەكەمەلەردىڭ بازالىق قارجىلاندىرۋى قايتارىلىپ جاتقانىن ءتۇسىندىردى.

سونداي-اق ول عالىمداردىڭ جالاقىسى 70 پايىزعا وسكەنىن ەسكە سالدى.

«عىلىمي دارەجەلەرى بار عىلىمي-زەرتتەۋ ينستيتۋتتارى مەن جوعارى وقۋ ورىندارىنىڭ قىزمەتكەرلەرى سارالانعان تۇردە قوسىمشا جاردەماقى الادى. بۇل وزگەرىستەر ەنگىزىلۋدە. بۇعان دەيىن مۇنداي دەربەستەندىرىلگەن جاردەماقىلار بولماعان. زەينەتكەر عالىمدارعا عىلىمي جەتىستىكتەرى ءۇشىن قوسىمشا سىياقىلار قاراستىرىلادى. اكادەميامىزدىڭ مۇشەلەرى مەن ولاردىڭ وتباسىلارى قوسىمشا مەديسينالىق كومەككە اۋىستىرىلادى. قازاقستاندىق عالىمدار مەملەكەتتىڭ قولداۋىن سەزىنسە ەكەن دەيمىز»، - دەپ قورىتىندىلادى ساياسات نۇربەك.