بۇگىن مەملەكەت باسشىسى قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتتى. وندا ەلىمىزدىڭ 2024 جىلعى الەۋمەتتىك-ەكونوميكالىق دامۋىنا قورىتىندى جاسالىنىپ، بيىل اتقارىلۋى ءتيىس مىندەتتەر جۇكتەلدى.
جالپى مۇنداي فورماتتاعى جيىن ەلدەگى جاعدايدى باقىلاۋدا ۇستاۋ جانە قىسقا ۋاقىتتا اتقارىلۋى ءتيىس شارۋالاردى پىسىقتاۋعا مۇمكىندىك بەرەدى. سوندىقتان ساياسي تۇرعىدان بىزگە ۇناسىن، ۇناماسىن وسىنداي جيىندار ءوتۋى قاجەت.
ۇكىمەت وتىرىسىنىڭ مازمۇنىنا كەلەر بولساق، وندا پرەمەر-مينيستر ولجاس بەكتەنوۆ، پرەمەر-مينيستردىڭ ورىنباسارى سەرىك جۇمانعارين، ۇلتتىق بانك ءتوراعاسى تيمۋر سۇلەيمەنوۆ، «سامۇرىق-قازىنا» اق باسقارما ءتوراعاسى نۇرلان جاقىپوۆ، استانا قالاسىنىڭ اكىمى جەڭىس قاسىمبەك، شىمكەنت قالاسىنىڭ اكىمى عابيت سىزدىقبەكوۆ، قىزىلوردا وبلىسىنىڭ اكىمى نۇرلىبەك نالىبايەۆ بايانداما جاسادى. كابمين باسشىسى وتكەن جىلعا قورىتىندى جاساپ، بيىل اتقارىلاتىن شارۋالار تۋرالى باياندادى. ونىڭ ورىنباسارى سەرىك جۇمانعارين قارجى-ەكونوميكالىق سالانى دامىتۋ بويىنشا ۇكىمەتتىڭ ۇسىنىستارىن ايتتى.
بايانداماشىلاردىڭ سوزىنەن كەيىن پرەزيدەنت ۇكىمەت پەن وزگە دە مەملەكەتىك ورگاندارعا بىرنەشە تاپسىرما بەردى. باسىم كوپشىلىگى بىلتىرعى جولداۋداعى تاپسىرمالاردى ورىنداۋ بويىنشا تاكتيكالىق ماسەلەلەردى قامتىعان. پرەزيدەنت اسىرەسە ەكونوميكانى ءارتاراپتاندىرۋدا ينۆەستيسيالىق كليماتقا باسا نازار اۋدارعان. وسى باعىتتا وڭدەۋ ونەركاسىبى، تۋريزم جانە وزگە دە سالالارعا باسىمدىق بەرۋدى تاپسىردى. بارلىق مىندەتتەر بيىل جىلدىڭ سوڭىنا دەيىن ورىندالۋى ءتيىس. سوندىقتان مەملەكەت باسشىسى ۇكىمەت مۇشەلەرىنەن شەشىم قابىلداۋدا باتىلدىق تانىتۋدى تالاپ ەتتى.
.