الماتى اكىمدىگى ازىرلەپ جاتقان «الماتى – ادامدار ءۇشىن جاھاندىق قالا» باعدارلاماسىنا قاتىستى الەۋمەتتانۋ عىلىمىنىڭ دوكتورى، ءال-فارابي اتىنداعى قازۇۋ فيلوسوفيا جانە ساياساتتانۋ فاكۋلتەتىنىڭ پروفەسسورى ابدىكەروۆا گۇلناپيس ورىنباسار قىزى ادامنىڭ ءومىر ءسۇرۋ دەڭگەيىن كوتەرۋ تۋرالى ءوز ويىمەن ءبولىستى دەپ حابارلايدى almaty-akshamy.kz
«الماتى اكىمدىگىنىڭ قالانى دامىتۋ بويىنشا 2025 جىلعا دەيىن دامىتۋدىڭ نەگىزگى باسىمدىقتارى مەن 2030 جىلعا دەيىنگى ورتا مەرزىمدى جاساعان پەرسپەكتيۆالارى وتە وزەكتى دەپ ويلايمىن. قازىرگى كەزدە ەڭ وزەكتى ماسەلە ادامداردىڭ ءومىر ءسۇرۋ دەڭگەيى بولىپ تابىلدى. الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىندا «جايلى قالالىق ورتا»، «تۇراقتى ەكونوميكالىق ءوسۋ»، «باسقارىلاتىن ۋربانيزاسيا»، «الەۋمەتتىك ورنىقتىلىق پەن تۇراقتىلىق»، «جاسىل الماتى»، «سمارت سيتي»، «ءقاۋىپسىز قالا» وسىنىڭ ءبارى جاقسى قامتىلعان»، – دەدى گۇلناپيس ورىنباسار قىزى.
الەۋمەتتانۋشىنىڭ ايتۋىنشا، ادامنىڭ ءومىر ءسۇرۋ دەڭگەيىن كوتەرۋ ءۇشىن ادامدارعا جايلى جاعداي جاسالۋى كەرەك.
«ەڭ ءبىرىنشى – ادامداردى كۇيزەلىسكە ءتۇسىپ، ءتۇرلى اۋرۋعا شالدىعۋىنا اكەلەتىن فاكتورلاردى ازايتۋى كەرەك. بۇل فاكتورلار ينفراسترۋكتۋرامەن تىعىز بايلانىستى. مىسالى، جول ساپاسى، ادامداردىڭ باراتىن جەرىنە قينالماي جەتۋى وزەكتى دەپ ەسەپتەيمىن. سونداي-اق قازىرگى كەزدە ينكليۋزيۆتى ورتا قۇرۋ يدەياسى وتە وزەكتى. ينكليۋزيۆتى ورتا - ادامداردىڭ ەش قيىندىقسىز سول قوعامعا كىرە الۋ مۇمكىندىگى بولىپ ەسەپتەلەدى. بۇل ماسەلە قازىرگى تاڭدا وتە وزەكتى»، – دەدى ول.
قالا تۇرعىندارى باعدارلامامەن تانىسىپ، ءوز ۇسىنىستارىن «الماتىنى دامىتۋ ورتالىعىنىڭ» سايتىندا 2022 جىلدىڭ 1 شىلدەسىنە دەيىن قالدىرا الادى.