وقۋشىلار سارايىنىڭ ۇلكەن كونسەرت زالىندا ۇلى وتان سوعىسىنداعى جەڭىستىڭ 80 جىلدىعىنا ارنالعان «ۇلى جەڭىس: ەرلىككە تاعزىم – ۇرپاققا ۇلگى» اتتى تاعىلىمى تەرەڭ مەرەكەلىك كونسەرت ءوتتى.
ك.بايسەيىتوۆا اتىنداعى دارىندى بالالارعا ارنالعان رەسپۋبليكالىق مامانداندىرىلعان مۋزىكالىق ورتا مەكتەپ-ينتەرناتىنىڭ باسشىلىعى مەن وقۋشىلارى ازىرلەگەن مادەني ءىس-شارا الماتى قالاسى اكىمدىگىنىڭ قولداۋىمەن ۇيىمداستىرىلدى.
كەش قوناقتارىنىڭ قاتارىندا الماتى قالاسى اكىمىنىڭ ورىنباسارى اسەم ءنۇسىپوۆا، قالالىق ءماسليحات دەپۋتاتتارى، قوعامدىق كەڭەس مۇشەلەرى، ەڭبەك ارداگەرلەرى بولدى. كورەرمەن قاتارىن وقىتۋشى-وقۋشىلار، سونداي-اق الەۋمەتتىك وسال توپتىڭ بالالارى تولىقتىردى.
كونسەرت شىمىلدىعىن حالىقارالىق بايقاۋلاردىڭ لاۋرەاتى بەرەكە ەنكەبايەۆا اشتى. ول جۇماقان سەيىلوۆتىڭ جۇرەك تەبىرەنتەر «انا تۋرالى باللادا» ءانىن ورىنداپ، كورەرمەندى بىردەن ەرەكشە اسەرگە بولەدى. ساحنادا ءان شىرقاعان ونەرپازداردى ۆاسيليي يۆانوۆ پەن نيكيتا بەلياكوۆتىڭ ديريجەرلىك ەتۋىمەن مۋزىكالىق ورتا مەكتەپ-ينتەرناتىنىڭ ۇرمەلى اسپاپتار وركەسترى سۇيەمەلدەدى.
مەرەكەلىك كەشتە سوعىس جانە سوعىستان كەيىنگى كەزەڭنىڭ ەلگە كەڭىنەن تانىلعان «كاتيۋشا»، «سمۋگليانكا»، «تەمنايا نوچ»، «جۋراۆلي»، «سينيي پلاتوچەك» سىندى اندەرى بالالار حورى مەن كاسىبي ارتىستەردىڭ ورىنداۋىندا شىرقالدى. كونسەرت بارىسىندا ۇلكەن ەكراننان سوعىس جىلدارىنداعى ءومىردى بەينەلەگەن كورىنىستەر كورسەتىلىپ كەش مازمۇنىن كەڭەيتتى.
قازاقستاننىڭ حالىق ءارتىسى، قازاق ونەرىنىڭ پريماسى روزا رىمبايەۆانىڭ ساحناعا شىعۋى - كەشتىڭ ەڭ اسەرلى ساتتەرىنىڭ ءبىرى بولدى. قاراپايىم دا جۇرەككە جەتەر سوزدەرىمەن كوپشىلىكتىڭ كوڭىلىن تولقىتقان ءانشى ساحناداعى جارتى عاسىرلىق ونەر جولىنا شولۋ جاسادى:
– بۇل كەشكە ەرەكشە كوڭىل-كۇيمەن كەلدىم. مەن ساحنادا 50 جىل بويى ءان سالىپ كەلەمىن. وسى ۋاقىت ىشىندە مەنى ءاردايىم ءاليا اپامنىڭ رۋحى قولداپ كەلە جاتقانداي سەزىنەمىن. ال ءان ونەرىندەگى العاشقى قادامىم بايقاۋلارعا قاتىسۋدان باستالدى. 1975 جىلى الماتىدا وتكەن جەڭىستىڭ 30 جىلدىعىنا ارنالعان پاتريوتتىق اندەر بايقاۋىندا «سنەگ سەدينى» ءانىن ورىنداپ، لاۋرەات اتاندىم. سول ءسات مەنىڭ ۇلكەن ساحناعا جول اشقان العاشقى جەڭىسىم بولدى. مىنە، ارادا جارتى عاسىر وتسە دە، سول ءان مەنى وسى كۇنگە دەيىن جەتەلەپ كەلەدى. بۇگىنگى كۇن – ارداگەرلەرگە تاعزىم ەتەتىن، بەيبىت كۇننىڭ ءقادىرىن سەزىنەتىن ءسات. مەن ەلىمنىڭ ەرتەڭىنە، جاس ۇرپاقتىڭ جارقىن بولاشاعىنا سەنەمىن، - دەدى حالىق سۇيىكتىسى.
وسى سوزدەردەن كەيىن روزا قۋانىش قىزى «ءاليا»، «قازاق ەلى»، «ەرتەڭىمە سەنەمىن»، «سنەگ سەدينى» سىندى تىڭدارمانداردىڭ جۇرەگىنەن ورىن العان اسەم اندەرىن ورىندادى. ونەر يەسىنىڭ ءاربىر ءانى – جۇرەكتىڭ ءۇنى، حالىقتىڭ ساعىنىشى، ۋاقىتپەن ۇندەسكەن اۋەن سەكىلدى اسەر قالدىردى.
كونسەرت سوڭىندا الەكساندر پاحمۋتوۆا مەن ميحايل لۆوۆتىڭ «پوكلونيمسيا ۆەليكيم تەم گودام» جانە داۆيد تۋحمانوۆتىڭ «جەڭىس كۇنى» اندەرى ورىندالىپ، بارلىق قاتىسۋشىلار ساحنادا باس قوسىپ، بۇل كەشتىڭ رۋحىن ءبىر ارناعا توعىستىردى. ودان كەيىن الماتى قالاسى اكىمىنىڭ اتىنان ىقىلاس گ ۇلى تابىستالدى. ونەرپازدارعا كورەرمەندەر ورىندارىنان تۇرىپ، ۇزاق قول شاپالاقتاپ قۇرمەت كورسەتتى.
قايرات بەگالين،
الماتى قالاسى ءماسليحاتىنىڭ دەپۋتاتى:
جەڭىستىڭ ماڭگىلىك ءمانى– ك.بايسەيىتوۆا اتىنداعى دارىندى بالالار مەكتەبى وقۋشىلارىنىڭ جەڭىستىڭ 80 جىلدىعىنا ارنالعان مازمۇندى، ماعىنالى كونسەرتىن تاماشالادىق. ۇلى جەڭىس – اتا-بابالارىمىزدىڭ قانى مەن جانى ارقىلى كەلگەن قاسيەتتى ۇعىم. وسىنداي كەشتەر جاس ۇرپاقتىڭ جۇرەگىنە ەلگە دەگەن سۇيىسپەنشىلىك پەن بەيبىت ءومىردىڭ باعاسىن ۇيالاتادى. بۇل – وتكەنگە تاعزىم عانا ەمەس، كەلەشەككە سەنىممەن قاراۋعا جەتەلەيتىن تاعىلىمدى ءسات. بۇگىنگى كەش – تەك ونەر مەرەكەسى عانا ەمەس، تاريحپەن تىلدەسكەن، جۇرەكتەردى بىرىكتىرگەن، وتكەنگە تاعزىم مەن بولاشاققا امانات جۇكتەگەن رۋحاني كەش بولدى.