الماتىدا Haval كولىگىنىڭ جۇرگىزۋشىسى قارسى باعىتتا كەلە جاتقان جەڭىل اۆتوكولىكتى سوعىپ، كەيىن پوليسيادان قاشۋعا ارەكەتتەنگەن، دەپ حابارلايدى Aqshamnews.kz ءتىلشىسى.
الەۋمەتتىك جەلىدە تاراعان ۆيدەونى الماتى قالالىق پوليسيا دەپارتامەنتى رەسمي تۇردە راستادى. ۆەدومستۆو مالىمەتىنشە، وقيعا 24 قاڭتاردا ساعات 23:06 شاماسىندا تيميريازيەۆ كوشەسىندە بولعان. تۇنگى تىنىشتىقتى كۇزەتۋ بارىسىندا پوليسيا قىزمەتكەرلەرى بورديۋرگە سوعىلعان Haval كولىگىن بايقاپ، توقتاتۋ تۋرالى زاڭدى تالاپ قويعانىمەن، جۇرگىزۋشى باعىنباي، قوزعالىسىن جالعاستىرىپ كەتكەن.
قۋعىن كەزىندە جاروكوۆ پەن وتەپوۆ كوشەلەرىنىڭ قيىلىسىندا اتالعان كولىك باسقا اۆتوكولىكپەن سوقتىعىسقان. جول-كولىك وقيعاسىنان كەيىن دە جۇرگىزۋشى وقيعا ورنىنان كەتپەك بولعانىمەن، پوليسەيلەر ونى ۇستاپ ۇلگەرگەن. تەكسەرۋ بارىسىندا جۇرگىزۋشىدەن الكوگولدىك ماساڭدىق بەلگىلەرى انىقتالعان.
پوليسيانىڭ حابارلاۋىنشا، جۇرگىزۋشى — شەتەل ازاماتى. وعان قاتىستى بىرنەشە اكىمشىلىك قۇقىق بۇزۋشىلىق بويىنشا ماتەريالدار راسىمدەلگەن: ماس كۇيىندە كولىك باسقارۋ، پوليسيا تالابىنا باعىنباۋ جانە جول-كولىك وقيعاسىن جاساۋ.
اكىمشىلىك سوت شەشىمىمەن قۇقىق بۇزۋشى 20 تاۋلىككە اكىمشىلىك قاماۋعا الىنىپ، 7 جىلعا كولىك باسقارۋ قۇقىعىنان ايىرىلعان. كولىك ارنايى ايىپ تۇراعىنا قويىلدى. پوليسيا دەپارتامەنتى ماس كۇيىندە كولىك جۇرگىزۋ مەن قۇقىق قورعاۋدان قاشۋ ارەكەتتەرى جول قوزعالىسىنا قاتىسۋشىلاردىڭ ءومىرى مەن دەنساۋلىعىنا تىكەلەي ءقاۋىپ توندىرەتىنىن ەسكەرتتى.