گونكونگ تۇماۋى اباي وبلىسى مەن الماتىعا دا جەتتى. ەكى ءوڭىردى قوسقاندا، جالپى سانى 32 ناۋقاس ۆيرۋستىڭ وسى ءتۇرىن جۇقتىرعان، - دەپ حابارلايدى aqshamnews.kz ءتىلشىسى كتك-عا سىلتەمە جاساپ.
ناۋقاستاردىڭ دەنە قىزۋى 40 گرادۋسقا دەيىن كوتەرىلىپ، وڭايلىقپەن تۇسپەيدى. ال دارىگەرلەر دەرتتەن ساقتانۋ ءۇشىن ەكپە سالدىرعان ءجون دەيدى.
"تۇماۋدىڭ الدىن الۋ شاراسى - ۆاكسيناسيا. ەڭ ءبىرىنشى كەزەكتە وسال توپتاعى ادامدار ەكپە سالدىرۋ كەرەك. ولارعا ارناپ جەرگىلىكتى بيۋدجەتتەن 60 مىڭ دوزا ساتىپ الىندى. بۇگىندە وبلىسىمىزدىڭ 10 پايىزعا جۋىق تۇرعىنى وسى تۇماۋعا قارسى ەكپە الدى"، - دەيدى اباي وبلىسى سانيتاريا-ەپيدەميولوگيانى باقىلاۋ دەپارتامەنتىنىڭ ءبولىم باسشىسى اينۇر سەرىكبايەۆا.
ەلىمىزدە رينوۆيرۋس، پاراگريپپ جانە كوروناۆيرۋسقا شالدىققاندارعا قاتىستى ستاتيستيكا دا ءماز ەمەس. ماسەلەن، الماتىدا ۆيرۋس جۇقتىرعاندار بىلتىرعىمەن سالىستىرعاندا 20 پايىزعا جوعارى. ياعني 23 مىڭعا جۋىق تۇرعىن تۇماۋمەن تىركەلگەن. ونىڭ جارتىسىنان كوبى - بالالار.
ال گونكونگ تۇماۋىمەن اۋىرىپ جۇرگەندەردىڭ قاتارىندا جۇكتى ايەل كوپ. ەپيداحۋالدىڭ كۇردەلەنۋىنە بايلانىستى اق حالاتتىلار كۇشەيتىلگەن جۇمىس تارتىبىنە كوشكەن.
ەپيدەميولوگيا ماۋسىمى كەزىندە ءوزىن ءوزى قورعاۋ ءۇشىن كوپشىلىك ورىندارعا بارعان كەزدە بەتپەردە كيۋ ۇسىنىلادى. كوپشىلىك باراتىن ورىندارعا كوپ بارماۋعا تىرىسىڭىز. بالالار بولماسا، ءوزى اۋىرا باستاعان كەزدە، ەڭ ءبىرىنشى كەزدە ۇيدە بولاتىن رەجيمدى ساقتاۋ كەرەك. ويتكەنى ول اۋىرىپ تۇرىپ، كوشەگە شىعاتىن بولسا، كوپشىلىك ورىندارعا باراتىن بولسا، ءوزى اۋىرعانىمەن قاتار باسقا دا جۇقتىرۋى مۇمكىن.