تۇركىستان وبلىسىندا 12 ادام، ونىڭ ىشىندە 9 بالا قازا تاپتى. بالا قۇقىقتارى جونىندەگى ۋاكىل دينارا زاكييەۆا بولعان جاعدايدىڭ ەگجەي-تەگجەيىن ءبولىستى، - دەپ حابارلايدى aqshamnews.kz ءتىلشىسى.
وڭىرلىك ۋاكىل پسيحولوگيالىق قولداۋ ورتالىعىنىڭ ماماندارىمەن بىرگە وقيعا ورنىنا باردى.
"ۇيدە ەكى وتباسى بولدى - اتا-انالار مەن بالالار. ءورت شىعىپ، شاتىر وپىرىلىپ ءتۇستى"، – دەپ جازدى زاكييەۆا Instagram-داعى ستوريسىندە.
وبلىستىق پوليسيا دەپارتامەنتىندە "ءورت قاۋىپسىزدىگى تالاپتارىن بۇزۋ" بابى بويىنشا قىلمىستىق ءىس قوزعالدى.
وقيعانىڭ ءمان-جايى
تۇركىستان وبلىسى توتەنشە جاعدايلار دەپارتامەنتىنىڭ مالىمەتىنشە، 18 قاراشادا تاڭەرتەڭ جەتىساي اۋدانىنا قاراستى العاباس اۋىلىنداعى ەكى قاباتتى جەكە تۇرعىن ۇيدەن ءورت شىققانى تۋرالى حابار تۇسكەن.
وقيعا ورنىنا جەتكەن ورتسوندىرۋشىلەر كەلگەن ساتتە ءۇي تولىقتاي ورتكە ورانعانى انىقتالعان. ءورتتى ءسوندىرۋ جانە بارلاۋ كەزىندە ۇيدەن ەس-تۇسسىز جاتقان ءۇش ادام ەۆاكۋاسيالانىپ، جەدەل جاردەم بريگاداسىنا تاپسىرىلدى.
"ءۇيدىڭ ىشىنەن 12 ادامنىڭ ءمايىتى تابىلدى، ولاردىڭ توعىزى – بالا"، – دەلىنگەن تجد حابارلاماسىندا.
كورشىلەردىڭ ايتۋىنشا، وقيعا بولعان ۇيدە قوناقتار بولعان، سەبەبى الدىڭعى كۇنى ءۇي يەلەرىندە ءىس-شارا وتكەن. ءورت 360 شارشى مەتر اۋماقتا تولىق ءسوندىرىلدى.
ءقازىر وقيعا ورنىندا بارلىق جەدەل قىزمەت جۇمىس ىستەپ جاتىر. ءورتتىڭ شىعۋ سەبەبى انىقتالىپ جاتىر، تەرگەۋ باستالدى.
ۇكىمەت پەن تۇركىستان وبلىسىنىڭ اكىمىنە زارداپ شەككەن ازاماتتاردىڭ تۋعان-تۋىستارىنا بارلىق قاجەتتى كومەك كورسەتىپ، قايعىلى وقيعانى جان-جاقتى تەكسەرۋدى تاپسىردى.