حالىقارالىق World Boxing فەدەراسياسى 2026 جىلعى 1 قاڭتاردان باستاپ ءوز جارىستارىنا قاتىساتىن 18 جاستان اسقان ەر سپورتشىلارعا مىندەتتى جىنىستىق (sex) تەكسەرۋ تالابىن ەنگىزدى، دەپ حابارلايدى Aqshamnews.kz.
ۇيىمنىڭ رەسمي مالىمەتىنشە، جاڭا ەرەجە World Boxing وتكىزەتىن نەمەسە سانكسيالايتىن بارلىق تۋرنيرلەرگە قولدانىلادى. ەندى 18 جاستان اسقان ەر بوكسشىلار جارىسقا قاتىسۋ ءۇشىن پسر (PCR) نەمەسە سوعان تەڭەستىرىلگەن مەديسينالىق-گەنەتيكالىق تەكسەرۋدەن ءوتۋى ءتيىس. تەكسەرىستىڭ ماقساتى – سپورتشىنىڭ تۋعان كەزدەگى جىنىسىن ايقىنداۋ جانە ءتيىستى ساناتتا جارىسقا قاتىسۋ قۇقىعىن راستاۋ.
World Boxing بۇعان دەيىن ايەلدەر ساناتىندا دا وسىنداي تالاپ ەنگىزىلگەنىن ەسكە سالدى. مىندەتتى تەستىلەۋ 2025 جىلعى تامىزدا ليۆەرپۋلدە وتكەن الەم چەمپيوناتى قارساڭىندا قولدانىسقا ەنگىزىلگەن.
بۇل شەشىم سپورتتاعى ءادىل باسەكە مەن قاۋىپسىزدىك ماسەلەسىنە قاتىستى تالقىلار كۇشەيگەن تۇستا قابىلداندى. اتاپ ايتقاندا، 2024 جىلعى پاريج وليمپياداسىنان كەيىن الجيرلىك يمان حەليف پەن تايۆاندىق لين ءيۋيتيندىڭ توڭىرەگىندە تەستوستەرون دەڭگەيى مەن سايكەستىك تالاپتارىنا بايلانىستى داۋلار بولعان.
ايتا كەتەيىك، 2025 جىلعى قاراشادا World Boxing پرەزيدەنتى بولىپ قازاقستاندىق بوكسشى گەنناديي گولوۆكين سايلاندى. ساراپشىلار جاڭا ەرەجەلەردى ۇيىمداعى رەفورمالاردىڭ ءبىر بولىگى رەتىندە باعالاپ، ونىڭ نەگىزگى ماقساتى – بوكستا ءادىل باسەكە قاعيدالارىن كۇشەيتۋ ەكەنىن ايتادى.