قازاقستاندىق بوكسشى گەنناديي گولوۆكين (42-1-1، 37 كو) مەن مەكسيكالىق ساۋل «كانەلو» الۆارەس (57-2-2، 39 كو) جەكپە-جەك الدىندا سالماق ولشەدى، دەپ حابارلايدى Almaty-akshamy.kz Inform.kz-كە سىلتەمە جاساپ.
گولوۆكيننىڭ تارازىداعى سالماعى 167،8 فۋنتا (76،11 كيلوگرامم)، ال «كانەلو» — 167،4 فۋنت (75،93 كيلوگرامم) بولدى. وسىلايشا، ەكى بوكسشى دا سۋپەرورتا سالماققا بەلگىلەنگەن، ياعني168 فۋنت (76،2 كيلوگرامم) ليميتتەن ءساتتى ءوتتى.
ەسكە سالايىق، گولوۆكين-الۆارەس جەكپە-جەگى 18 قىركۇيەك كۇنى (استانا ۋاقىتىمەن) لاس-ۆەگاستىڭ (سشا) T-Mobile Arena كەشەنىندە وتەدى.
قازاقستاندىقتار بوكس كەشىن «Qazaqstan» جانە «Qazsport» تەلەارنالارىنان تىكەلەي ەفيردەن كورە الادى. باستالۋى – 18 قىركۇيەك، ساعات 05:00. باستى ايقاس شامامەن 08.00-دە.
GGG مەن «كانەلو»-نىڭ 2017 جىلى وتكەن العاشقى ايقاسى تورەشىلەردىڭ ءتۇرلى داۋىسىمەن تەڭ اياقتالعان ەدى. 2018 جىلى بولعان رەماچ تورەشىلەردىڭ باسىم داۋىسىمەن الۆارەستىڭ پايداسىنا شەشىلدى. تريلوگيا سۋپەرورتا سالماقتا (ءبىرىنشى جانە ەكىنشى كەزدەسۋلەر ورتا سالماقتا وتكەن بولاتىن) وتەدى. ءقازىر بۇل ساناتتاعى بارلىق چەمپيوندىق تيتۋل «كانەلوعا» تيەسىلى. ال گولوۆكيننىڭ ەنشىسىندە WBA Super، IBF جانە IBO نۇسقالارى بويىنشا ورتا سالماقتاعى بەلدىكتەر بار.