وسى جىلدىڭ 1 قىركۇيەگىنە دەيىن شەتەلدەن ەلگە اكەلىنگەن اۆتوكولىكتەردىڭ ءتىزىمى جاسالدى. بۇل تۋرالى Almaty-akshamy.kz Inform.kz-كە سىلتەمە جاساپ حابارلايدى.
مەملەكەت باسشىسى اعىمداعى جىلدىڭ 1 قىركۇيەگىنە دەيىن قازاقستانعا اكەلىنگەن شەتەلدىك اۆتوكولىكتەردى زاڭداستىرۋ مىندەتىن جۇكتەگەن بولاتىن. ءقازىر بۇل ءۇشىن مەملەكەتتىك ورگاندار بارلىق قاجەتتى زاڭنامالىق جانە ۇيىمداستىرۋشىلىق شارالاردى قابىلداۋدا. ەكولوگيالىق جانە سالىق كودەكستەرىنە تۇزەتۋلەر ازىرلەندى.
ءىىم حابارلاۋىنشا، ازاماتتار باستاپقى تىركەۋ ءۇشىن 200-250 مىڭ تەڭگە كولەمىندە عانا الىم تولەيتىن بولادى. زاڭداستىرۋ كەزىندە ۋتيل الىم تولەنبەيدى.
«كودەكستەرگە تۇزەتۋلەر كەلەسى جىلدىڭ قاڭتارىنان باستاپ كۇشىنە ەنەدى، سوندىقتان زاڭداستىرۋ كەلەسى جىلدان باستاپ جۇرگىزىلەتىن بولادى. وسى جىلدىڭ 1 قىركۇيەگىنە دەيىن ەلگە اكەلىنگەن اۆتوكولىكتەردىڭ ءتىزىمى جاسالدى. كەيىنىرەك اكەلىنگەن اۆتوكولىكتەر زاڭداستىرۋعا جاتپايدى جانە جالپى نەگىزدە تىركەلەدى»- دەدى مينيسترلىكتەن.
بۇگىنگى تاڭدا ءىىم جانە باسقا دا مەملەكەتتىك ورگاندار اۆتوكولىكتەردى زاڭداستىرۋدى بارىنشا قاراپايىم جانە تۇسىنىكتى ەتۋ تاسىلدەرىن ازىرلەۋدە. اۆتوكولىكتەردى زاڭداستىرۋ ءۇشىن پوليسياعا ءونلاين-وتىنىش بەرۋ مۇمكىندىگى پىسىقتالۋدا. پوليسيامەن بايلانىس ورتالىقتارىنىڭ جۇمىسى ۇيىمداستىرىلادى.
تىركەلگەن كولىكتەرگە قاراپايىم اق نومىرلەر بەرىلەدى، پوليسيا قانداي دا ءبىر شەكتەۋلەر قويمايدى.
ەۋرازيالىق ەكونوميكالىق وداقتىڭ تاۋارى بولىپ تابىلمايتىن اۆتوكولىكتەر كەدەندىك باجداردى تولەۋى ءتيىس. بۇل ءۇشىن قارجى مينيسترلىگى ازاماتتارعا قولايلى كەدەندىك دەكلاراسيالاۋ تەتىكتەرىن ازىرلەۋدە. زاڭداستىرۋدى وتكىزۋدىڭ بارلىق شارتتارى ازىرلەنگەننەن كەيىن ۇكىمەتتىڭ ءتيىستى قاۋلىسى قابىلداناتىن بولادى.
ايتا كەتۋ كەرەك، زاڭداستىرۋعا «قىلمىستىق» جانە كەدەندىك باقىلاۋدان وتپەگەن اۆتوكولىكتەر كىرمەيدى. اۆتوكولىكتەردىڭ شىعارىلعان جىلىنا جانە ەكولوگيالىق ساناتتارىنا قاراي تالاپتار جوق. قالعان تالاپتار بويىنشا شەشىم ءقازىر ۇلتتىق جانە حالىقارالىق زاڭنامانى ەسكەرە وتىرىپ قابىلدانۋدا.
سونداي-اق ءىىم جول ەرەجەسىن بۇزۋدىڭ كەيبىر تۇرلەرى بويىنشا جاۋاپكەرشىلىكتى كۇشەيتۋ بولعانىمەن، پوليسيا شەتەلدىك اۆتوكولىكتەر بويىنشا ەشقانداي ارنايى رەيدتىك ءىس-شارالار جۇرگىزبەيتىنىن حابارلادى.