ايگىلى امەريكالىق ستۋديا گرۋزيامەن جانە قازاقستانمەن وداق قۇرادى.
تەلەشوۋ جانە كينو ءتۇسىرۋ بويىنشا ىنتىماقتاستىق قوس ەلدىڭ ۇلتتىق مادەنيەتىن دارىپتەپ، ايماق ەكونوميكاسىن دامىتۋعا سەپتىگىن تيگىزەدى دەگەن سەنىم مول. العاشقى ءفيلمدى قازاقستاندا ءتۇسىرۋ جوسپارلانىپ وتىر، دەپ حابارلايدى Almaty-akshamy.kz.
امەريكالىق WonderHill Studios كومپانياسى قازاقستان جانە گرۋزيا ەلدەرىمەن ىنتىماقتاستىق تۋرالى مەموراندۋمعا قول قويدى. سالتاناتتى شارا سيناندالي قالاسىندا ءوتتى.
«COVID-19 كەسىرىنەن ستۋديامىز فيلم ءتۇسىرۋدى توقتاتىپ، تەلەباعدارلاما وندىرىسىنە دەن قويدى. ءبارى امەريكالىق كورەرمەن اراسىندا كەڭىنەن تانىلدى. ءقازىر قايتادان كينو ءتۇسىرىلىمىن قولعا الىپ جاتىرمىز. وسى رەتتە گرۋزيامەن سەرىكتەستىك ورناتۋدى ءجون كوردىك. قازاقستان دا ءبىزدىڭ جوبالارعا قاتىسۋعا دايىن. مەنىڭشە، مۇنداي ىنتىماقتاستىق ايماققا جاڭا مۇمكىندىكتەر اشادى»، دەدى مارۆين پيرت، WonderHill Studios كومپانياسىنىڭ باس ديرەكتورى.
العاشقى بىرلەسكەن كوركەم فيلم قازاقستان مەن اقش-تا تۇسىرىلەدى. تۋىندىنىڭ جەلىسى ەرلەر اراسىنداعى بايگەدە باس جۇلدەنى قانجىعاسىنا بايلاعان تۇڭعىش قازاق قىزى جايلى ءوربيدى.
«مەن قازاقستاننىڭ ءبىراز وڭىرىنە ساياحاتتاپ، ءتۇرلى ادامدارمەن تانىستىم. ولاردان قازاق حالقىنىڭ ءسالت-داستۇرى تۋرالى كوپ نارسە ءبىلدىم. فيلم تۇسىرۋگە بولاتىنداي وقيعالار مەن اڭگىمەلەر ەستىدىم. سول كەزدە بايگە ءداستۇرى مەن ادامداردىڭ ومىرلىك قۇندىلىعى تۋرالى تولىققاندى فيلم تۇسىرۋگە بولادى دەگەن وي كەلدى. مەنىڭشە، اقش-تا بايگەگە ءتۇسىپ جۇرگەن قازاق قىزى جايلى شىعارما امەريكالىقتاردىڭ كوڭىلىنەن شىعادى دەپ ويلايمىن»، دەدى سەناريست توم تيچولز.
ءفيلمنىڭ سەنارييى دايىن. ءقازىر ارتىستەر ىرىكتەلىپ جاتىر. باستى ءرولدى اقش-تاعى قانداسىمىز ايانات كىسەنباي سومدايدى. اكتەر قالىڭ كورەرمەنگە «كوشپەندىلەر»، «ءلايلانىڭ زارى» فيلمدەرى ارقىلى تانىس.
ءفيلمنىڭ بيۋدجەتى – 45 ميلليون دوللار. تۋىندى كەلەسى جىلى تۇسىرىلەدى. سونىڭ ارقاسىندا 2،5 مىڭ جاڭا جۇمىس ورنى اشىلماق.