قازاقستان كينوتەاترلارىندا گولليۆۋد فيلمدەرى كورسەتىلمەي قالۋى مۇمكىن.
رەسەيگە قاتىستى ەنگىزىلگەن سانكسيالاردان كەيىن بۇل ماسەلە وتاندىق ديستريبيۋتورلار مەن كينوكورەرمەندى مازالاعانى انىق. دەگەنمەن بىرنەشە كۇن بۇرىن ەلىمىزدىڭ باس كينوستۋدياسى «قازاقفيلم» الەمدىك پرەمەرالاردى دىبىستاۋعا دايىن ەكەنىن مالىمدەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
شەتەلدىك فيلمدەردى قازاقشا سويلەتۋگە تەحنيكالىق مۇمكىندىكتەر دە، كاسىبي دۋبلياج اكتەرلەرى دە جەتكىلىكتى. الايدا بۇل – قىمبات پروسەسس. سوندىقتان ول قانشالىق وتەلەدى؟ مامانداردى وسى ماسەلە تولعاندىرادى.
«ستاندارت بويىنشا ءبىر ءفيلمدى دۋبلياجداۋ سۋبتيترلەۋگە قاراعاندا قىمبات. «قازاقشا سۋبتيتردەن باستاساق» دەگەن ۇسىنىس بولدى. الداعى ۋاقىتتا بۇل فيلمدەر بىزگە بەرىلىپ جاتسا، دۋبلياجدان بۇرىن ءسۋبتيتردى قولعا العان ءجون. نەگە؟ ءتۇسىندىرىپ كورەيىن. بىرىنشىدەن، دۋبلياجعا قاراعاندا الدەقايدا ارزان. فيلم اعىلشىن تىلىندە ءتۇپنۇسقادا جۇرسە، سۋبتيتر قازاق تىلىندە بولادى. بۇل كورەرمەندەردىڭ تەزىرەك اعىلشىن ءتىلىن مەڭگەرىپ الۋىنا دا سەپ بولماق»، - دەيدى ش.ايمانوۆ اتىنداعى «قازاقفيلم» ستۋدياسىنىڭ ءوندىرىس بويىنشا ۆيسە-پرەزيدەنتى ايدار باتالوۆ.
ءبىر فيلمدە عانا الەمدىك كينوجۇلدىزداردى قازاقشا سويلەتۋ ءۇشىن شامامەن 100 مىڭ دوللار قاجەت. الايدا دۋبلياجدىڭ قىمباتتىعى گولليۆۋد پرەمەرالارىنىڭ پروكاتىنا كەرى اسەر ەتەتىن جالعىز ءقاۋىپ ەمەس. اقش-تىڭ ەڭ ءىرى ستۋديالارىمەن كەلىسسوزدەر جۇرگىزۋ كەرەكتىگىن ۇمىتپاۋ قاجەت.
«بىزگە تىكەلەي كەلىسىم نەمەسە ايماقتىق ديستريبيۋتور ارقىلى 30-50 فيلم بەرىلسە. دەگەنمەن كۇدىك تە بار، سەبەبى ءبىزدىڭ نارىق ۇلكەن ەمەس»، - دەيدى ش.ايمانوۆ اتىنداعى «قازاقفيلم» ستۋدياسىنىڭ ءوندىرىس بويىنشا ۆيسە-پرەزيدەنتى ايدار باتالوۆ.
ەندى جاعدايدىڭ قالاي ءوربيتىنىن كۇتۋ كەرەك. مۇمكىندىك اشىلىپ جاتسا، ارتىقشىلىقتارى ايتپاسا دا تۇسىنىكتى. وتاندىق كينويندۋستريانىڭ دامۋىندا ءىرى سەرپىلىس بولارى انىق. بيىلدىڭ وزىندە «قازاقفيلم» كەڭ پروكاتقا 5 جاڭا فيلم دايىنداعان. ونىڭ ۇشەۋى – دراما، ەكەۋى – كومەديا جانە ءبىر تاريحي فيلم بار.