ۇلتتىق كينو ورتالىعى قاڭتاردا شەتەلدىك فيلمدەردى دۋبلياجداۋعا كونكۋرس جاريالاعان.
ءبىراق ەشبىر كومپانيا وعان قاتىسۋعا ءوتىنىم بەرمەگەن، دەپ حابارلايدى Almaty-akshamy.kz
سول سەبەپتى ورتالىق كونكۋرستى اقپاندا قايتا جاريالادى.
ۇلتتىق كينونى قولداۋ ورتالىعى قازاقستان اۋماعىنا اكەلىنەتىن بالالارعا ارنالعان انيماسيالىق فيلمدەر مەن وتباسىلىق فيلمدەردىڭ قازاق تىلىندەگى دۋبلياجىن قارجىلاندىراتىن ءبىرىڭعاي وپەراتور. دۋبلياجعا ارنالعان فيلمدەر مادەنيەت جانە سپورت ءمينيسترىنىڭ بۇيرىعىنا سايكەس ىرىكتەلەدى.
«2024 جىلى رەيتينگى جوعارى، پرەمەراسى وتپەگەن جاڭا 15 بلوكباستەردى قازاق تىلىنە دۋبلياجداۋ جوسپاردا بار. اتالمىش ءىس – شارالاردى ىسكە اسىرۋ ماقساتىندا مەملەكەتتىك بيۋدجەتتەن 2024 جىلعا 443،0 ملن. تەڭگە قاراجات قاراستىرىلعان»، دەلىنگەن مادەنيەت جانە اقپارات مينيسترلىگىنىڭ اقپاراتىندا.
مينيسترلىكتىڭ مالىمەتىنشە، كونكۋرسقا ءوتىنىم بەرگىسى كەلەتىن كومپانيادا اۆتورلىق قۇقىقتى ساقتاۋ سالاسىنداعى حالىقارالىق تالاپتارعا سايكەس كەلەتىن كونتەنتى، قۇقىق يەلەنۋشىلەرىنەن قازاق تىلىنە دۋبلياج جاساۋعا قاجەتتى وكىلەتتىكتەرى مەن قۇقىعى بولۋى ءتيىس.