لەوناردو دي كاپريو قازاقستان ۇكىمەتىنە ۇندەۋ جاسادى.
"وسكار" يەگەرى 25 جەلتوقساندا Instagram-داعى پاراقشاسىندا قازاقستان بيلىگىن جويىلىپ بارا جاتقان جانۋارلار ءتۇرىنىڭ پوپۋلياسياسىنىڭ كوبەيۋىمەن قۇتتىقتادى، دەپ حابارلايدى Almaty-akshamy.kz
"براكونەرلىككە قارسى باستامالارعا، كۇشتى قۇقىق قورعاۋ ورگاندارىنا جانە جاڭا قورعالاتىن تابيعي اۋماقتاردى قۇرۋعا قوماقتى قارجى بولگەن قازاقستان ۇكىمەتىن قۇتتىقتايمىز. ولاردىڭ تابيعاتتى قورعاۋ ۇيىمدارىمەن، ۋنيۆەرسيتەتتەرمەن جانە عالىمدارمەن ىنتىماقتاستىعى تابيعاتتى قورعاۋ ىسىندەگى شىنايى تابىستى مىسال"، دەپتى لەوناردو دي كاپريو.
سونىمەن قاتار "تيتانيك" ءفيلمىنىڭ جۇلدىزى كيىكتەردىڭ حالىقارالىق "قىزىل كىتاپتاعى" "كريتيكالىق ءقاۋىپ ءتونىپ تۇرعاندار" ساناتىنان "ءقاۋىپ ءتونىپ تۇرعاندار" ساناتىنا اۋىستىرىلۋىن ءساتتى دەپ اتادى.
"جانۋاردىڭ بۇرىن-سوڭدى بولماعان قالپىنا كەلۋى قازاقستانداعى اقبوكەننىڭ كەرەمەت ساقتالعانىن كورسەتەدى. ءبىر كەزدەرى، دالىرەك 2005 جىلى 48 000 باس بولعان بۇل ءتۇر ءقازىر جابايى تابيعاتتا 1،9 ميلليوننان استامعا دەيىن وسكەن"، دەگەن لەوناردو دي كاپريو.
ايتا كەتۋ كەرەك، اكتەر كليماتتىڭ وزگەرۋى مەن پلانەتانىڭ لاستانۋى ماسەلەلەرىن شەشۋگە ۇنەمى قوماقتى قاراجات بولەدى. ءوزىنىڭ مانسابىندا ول ەكوجۇيەلەر مەن قاۋىمداستىقتاردىڭ تەپە-تەڭدىگىن قالپىنا كەلتىرە وتىرىپ، جابايى تابيعاتتى جويىلۋدان قورعاۋعا باعىتتالعان ەكى جۇزدەن استام جوبانى قولدادى.
2023 جىلدىڭ 12 جەلتوقسانىندا حالىقارالىق تابيعاتتى قورعاۋ وداعى اقبوكەندەردىڭ جويىلىپ كەتۋ ءقاۋپى تونگەن تۇرلەر قاتارىنا جاتپايتىنىن حابارلادى. ەجەلگى بوكەندەر حالىقارالىق "قىزىل كىتاپتا" ءقاۋىپ تونۋگە جاقىن دەگەن ساناتقا جاتقىزىلعان.