ەلىمىزدىڭ اۋماعىندا «پيروتەحنيكا» جەدەل الدىن الۋ ءىس-شاراسى باستالدى. بۇل تۋرالى ءىىم اكىمشىلىك پوليسيا كوميتەتىنىڭ باسقارما باستىعى اسىلبەك ىدىرىسوۆ ايتتى، دەپ حابارلايدى اlmaty-akshamy.kz.
«ىشكى ىستەر مينيسترلىگى وسى جىلعى 25 جەلتوقساننان باستاپ 2024 جىلعى 3 قاڭتار ارالىعىندا توتەنشە جاعدايلار مينيسترلىگىنىڭ ازاماتتىق قورعاۋ بولىمشەلەرىمەن بىرلەسىپ، «پيروتەحنيكا» جەدەل الدىن الۋ ءىس-شاراسىن وتكىزەدى. اتالعان ءىس-شارا نارىقتاردا سەرتيفيكاتتالماعان پيروتەحنيكالىق بۇيىمداردى، سونداي-اق ولاردى رۇقساتسىز بەي-بەرەكەت ساتۋ فاكتىلەرىن انىقتاۋعا جانە جولىن كەسۋگە باعىتتالعان. ءىس-شارالار بارىسىندا پيروتەحنيكالىق بۇيىمداردى ساقتاۋ، ەسەپكە الۋ، پايدالانۋ، تاسىمالداۋ ءتارتىبىنىڭ ساقتالۋ مانىنە زاڭدى تۇلعالار جانە ساۋدا ورىندارىن تەكسەرەتىن بولادى»، - دەدى ول مينيسترلىكتىڭ باسپا ءسوز قىزمەتى الاڭىندا وتكەن بريفينگتە.
ونىڭ اتاپ وتۋىنشە، كامەلەتكە تولماعاندارمەن پيروتەحنيكالىق بۇيىمداردى پايدالانۋ كەزىندە جاراقات الۋدىڭ پروفيلاكتيكاسىنا ەرەكشە كوڭىل بولىنەدى. بۇل رەتتە، مەكتەپتەردە وقۋشىلارمەن ءتيىستى ءتۇسىندىرۋ جۇمىستارى جۇرگىزىلەدى. پيروتەحنيكا – بۇل ءورتتىڭ شىعۋىنا عانا ەمەس، ادام دەنساۋلىعىنا ايتارلىقتاي زيان كەلتىرەتىن ءقاۋىپتى قۇرال. ونى دۇرىس پايدالانباسا جازاتايىم جاعدايعا اكەلۋى مۇمكىن.
«قاۋىپسىزدىك ماقساتىندا پيروتەحنيكالىق بۇيىمداردى ساتۋ قىزمەتى تۇرىنە ءتيىستى ليسەنزيالارى بار مامانداندىرىلعان دۇكەندەر مەن ساۋدا ورىندارىنان عانا ساتىپ العان دۇرىس. پيروتەحنيكانى ساتىپ الۋ كەزىندە ەڭ الدىمەن ساتۋشىدان ونىمگە سايكەستىك سەرتيفيكاتىن تالاپ ەتۋ قاجەت. ءاربىر پيروتەحنيكالىق بۇيىم ءۇشىن مەملەكەتتىك جانە ورىس تىلدەرىندە ونى قولدانۋ جونىندەگى نۇسقاۋلىق بولۋى كەرەك. بۇيىمنىڭ سىرتقى قاپتاماسىنىڭ دۇرىستىعىنا جانە ساقتاۋ مەرزىمىنە مىندەتتى تۇردە نازار اۋدارعان ءجون»، - دەدى اسىلبەك ىدىرىسوۆ.
مينيسترلىك وكىلىنىڭ ايتۋىنشا، ەلىمىزدە پيروتەحنيكالىق بۇيىمداردى ءوندىرۋ، ساتۋ قىزمەتى لەسەنزيالاۋعا جاتادى. بۇگىنگى كۇنى وسى قىزمەت تۇرىمەن اينالىساتىن 40-تان استام زاڭدى تۇلعا تىركەۋدە تۇر. ال پيروتەحنيكالىق بۇيىمداردى زاڭسىز (رۇقسات قۇجاتتارسىز) ساتقانى، وتكىزگەنى، تاسىمالداعانى ءۇشىن اكىمشىلىك قۇقىق بۇزۋشىلىق تۋرالى كودەكس باپتارىمەن جاۋاپكەرشىلىك كوزدەلگەن.
اتاپ ايتقاندا، ەركiن ساۋدا جاساۋعا قازاقستان زاڭناماسىمەن تىيىم سالىنعان نەمەسە شەكتەلگەن تاۋارلارمەن جانە وزگە دە زاتتارمەن ساۋدا جاساعانى ءۇشىن 86 مىڭ 250 تەڭگە، جەكە تۇلعالاردىڭ تىنىشتىعىن پيروتەحنيكانى قولدانا وتىرىپ بۇزعانى ءۇشىن 69 مىڭ تەڭگە مولشەرiندە ايىپپۇل سالىنادى.