ەكىنشى دۇنيەجۇزىلىك سوعىس كەزىندە كونسلاگەرلەردە قازا تاپقان قازاقستاندىق جاۋىنگەرلەردىڭ جاقىندارى ىزدەستىرىلۋدە
ءىى دۇنيەجۇزىلىك سوعىس كەزىندە گەرمانياداعى كونسلاگەرلەردە قازا بولعان 927 وتانداسىمىزدىڭ ءتىزىمى تابىلدى. بۇگىندە ولاردىڭ تۋىستارىن ىزدەستىرۋ جۇمىسى ءجۇرىپ جاتىر. بۇل تۋرالى ق ر قورعانىس ءمينيسترىنىڭ ورىنباسارى تيمۋر داندىبايەۆ ءمالىم ەتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«ۆوزۆراششەنيە يمەني» حالىقارالىق پاتريوتتىق ۇيىمى بىزگە سوعىس كەزىندە گەرمانياداعى كونسلاگەرلەردە قازا تاپقان 927 قازاقستاندىق جاۋىنگەردىڭ ءتىزىمىن بەردى. قازىرگى ۋاقىتتا قازا تاپقانداردىڭ تۋىستارىن انىقتاۋ بويىنشا جۇمىستار ءجۇرىپ جاتىر. سونداي-اق، ءبىزدىڭ مينيسترلىك وكىلدەرى بيىل 8 مامىردا «پلاسدارم» قوعامدىق ۇيىمىنىڭ شاقىرۋىمەن ۋكرايناعا بارىپ، سلاۆيانسك ءۇشىن شايقاستا قازا تاپقان 99 جاۋىنگەردىڭ، ونىڭ ىشىندە جەرلەسىمىز - لەيتەنانت ۇكىباي بازاربايدىڭ سۇيەكتەرىن قايتا جەرلەۋ راسىمىنە قاتىستى. ودان بولەك، قازىرگى ۋاقىتتا رەسەيلىك ىزدەۋ توبى ءبىزدىڭ 12 جەرلەسىمىزدىڭ دەنە قالدىقتارىنا ساراپتاما جۇرگىزۋدە، كەيىن ولار بىزگە بەرىلەدى»، - دەدى تيمۋر داندىبايەۆ.
بۇعان دەيىن ق ر قورعانىس ءمينيسترىنىڭ ورىنباسارى ءىى دۇنيەجۇزىلىك سوعىستا حابار-وشارسىز كەتكەن 7 وتانداسىمىزدىڭ ءمايىتى تابىلعانىن ايتتى. ونىڭ مالىمدەۋىنشە، جوعالعانداردىڭ اتى-جوندەرى انىقتالىپ، ەلگە جەتكىزىلگەن. ايتا كەتەيىك، بۇگىن ەلوردادا ۇلى وتان سوعىسىنىڭ 80 جىلدىعىنا ارنالعان «الەمدى قورعاعانداردى ەستە ساقتاۋ، اقيقاتتى جەتكىزۋ» اتتى حالىقارالىق كونفەرەنسيا ءوتىپ جاتىر. شارا «Atamnyn Amanaty» قوعامدىق بىرلەستىگى «رەسەيدىڭ ىزدەۋ قوزعالىسى» جالپىرەسەيلىك قوعامدىق قوزعالىسىمەن بىرلەسىپ، پرەزيدەنتتىك گرانتتار قورىنىڭ قولداۋىمەن ۇيىمداستىرىلىپ وتىر.