عالىمدار يلون ماسكتىڭ جەرسەرىكتەرى زەرتتەۋگە كەدەرگى كەلتىرەتىنىن ايتتى
SpaceX كومپانياسىنىڭ كوپتەگەن Starlink جەرسەرىكتەرى استرونومدارعا ساپالى سۋرەتتەر تۇسىرۋگە ءارى ىقتيمال ءقاۋىپتى استەرويدتاردى باقىلاۋ جۇمىسىنا كەدەرگى كەلتىرۋى مۇمكىن، دەپ حابارلايدى Almaty-akshamy.kz Zakon.kz-كە سىلتەمە جاساپ.
بۇل تۋرالى Astrophysical Journal Letters عىلىمي جۋرنالىندا جاريالانعان زەرتتەۋدە ايتىلادى.
زەرتتەۋشىلەر Starlink جەرسەرىكتەرىنىڭ وڭتۇستىك كاليفورنياداعى پالومار وبسەرۆاتورياسىندا استرونومدار تۇسىرگەن 300 مىڭعا جۋىق سۋرەتتەرگە اسەرىن تالدادى. سونىمەن، 2019 جىلدىڭ قاراشاسىنان 2021 جىلدىڭ قىركۇيەگىنە دەيىن ولار ساپاسىز سۋرەتتەر سانىنىڭ 35 ەسە وسكەنىن انىقتادى. 2019 جىلى تۇسىرىلگەن سۋرەتتەردىڭ 0،5% كولەگەيلەنىپ قالسا، ال ءقازىر بۇل كورسەتكىش 20%-عا دەيىن وسكەن.
ۆاشينگتون ۋنيۆەرسيتەتىنىڭ استرونومى ەريك بەللدىڭ ايتۋىنشا، كۇن ساۋلەسىنىڭ شاعىلىسقان جولاقتارى ءقاۋىپتى استەرويدتاردى ىزدەۋدى قيىنداتۋى مۇمكىن.
زەرتتەۋشىلەردىڭ ايتۋىنشا، ءقازىر جەر وربيتاسىندا 1،6 مىڭنان استام Starlink جەر سەرىكتەرى اينالىپ ءجۇر. جالپى العاندا، كومپانيا 12 مىڭ نىساندى اينالىمعا شىعارۋعا رۇقسات الدى جانە تاعى 30 مىڭىنا ءوتىنىم بەردى.