ايبىنى اسقاق قازاق ەلى!
گەرمانيانىڭ ماينداعى فرانكفۋرت قالاسىندا قازاقستان تاۋەلسىزدىگىنىڭ 30 جىلدىعىنا ارنالعان فوتوكورمە اشىلدى، دەپ حابارلايدى Almaty-akshamy.kz.
ەكسپوزيسيادا ەلىمىزدىڭ قازىرگى زامانعى ساۋلەت ونەرى، ۇلتتىق سالت-داستۇرلەرى كورىنىس تاپقان تۋىندىلار ۇسىنىلدى. قازاقستاننىڭ كوركەم تابيعاتى بەينەلەنگەن سۋرەتتەر كوپتى كورگەن ساياحاتشىلاردىڭ ءوزىن تاڭعالدىردى. كەيبىرەۋلەرى تىپتەن كەلەسى دەمالىسىن ەلىمىزدە وتكىزبەككە شەشىم قابىلداعان.
حانس-پەتەر ۆيللي، شۆەيساريانىڭ ماين فرانكفۋرتتەگى كونسۋلىنىڭ ورىنباسارى ءبىزدىڭ ەل تۋرالى اسەرىمەن ءبولىستى.
«ەلدەرىڭىز قانداي الۋان ءتۇرلى! كولدەرى دە، شولدەرى دە جانە زامانۋي قالالارى دا بار. بۇعان دەيىن وسىنى بىلمەپپىن، تەك كورمەدە عانا بۇكىل سۇلۋلىعىن كوردىم. ەندى قازاقستانعا بارۋدى كوزدەپ وتىرمىز»، - دەدى ول.
ينا حاۋك، ماينداعى فرانكفۋرت ماگيستراتىنىڭ كەڭەسشىسى قالا اتىنان قازاقستاندىقتاردى تاۋەلسىزدىكتىڭ 30 جىلدىعىمەن قۇتتىقتادى.
«مۇندا سوڭعى 30 جىلدا قازاقستاننىڭ قالاي دامىعانىن كورۋگە بولادى. ماعان ۇلكەن اسەر قالدىردى. قازاقستاندا ءالى بولعان ەمەسپىن، ءبىراق وسى كەرەمەت ەلگە بارعىم كەلەدى. عىلىم، ءبىلىم مەن بيزنەستە ارامىزدا تىعىز ىنتىماقتاستىق ورناعان. بارلىق سالادا جۇمىسىمىز تابىستى بولارىنا ءۇمىت كوپ. قالامىزدىڭ اتىنان قازاقستاندىقتاردى تاۋەلسىزدىكتىڭ 30 جىلدىعىمەن قۇتتىقتايمىن».