گەرمانيادا جۇك جانە جولاۋشىلار پويىزدارىنىڭ جۇرگىزۋشىلەرى ءۇش كۇندىك نارازىلىق اكسياسىن باستاپ، بۇل بۇكىل ەل بويىنشا تەمىرجول قاتىناسىندا ۇزىلىستەرگە اكەلدى. سونىمەن بىرگە نەمىس فەرمەرلەرى سۋبسيديالاردىڭ جوسپارلى قىسقارتىلۋىنا نارازىلىق ءبىلدىرىپ، جولداردى جاۋىپ جاتىر6 دەپ حابارلايدى اlmaty-akshamy.kz ۆۆس-گە سىلتەمە جاساپ.
Deutsche Bahn (DB) ۇلتتىق تەمىرجول وپەراتورىنىڭ مالىمەتىنشە، ۇزاق ساپارعا شىعاتىن پويىزداردىڭ شامامەن 80%-ى توقتاتىلدى. شەكتەۋلەر ايماقتىق تاسىمالداۋعا دا اسەر ەتەدى.
ماشينيستەر كاسىپوداعى جالاقىنى كوتەرۋدى، سونداي-اق پويىز ماشينيستەرىنىڭ جۇمىس ۋاقىتىن اپتاسىنا 38 ساعاتتان 35 ساعاتقا دەيىن قىسقارتۋدى تالاپ ەتىپ وتىر.
Deutsche Bahn بۇل تالاپتاردى قاناعاتتاندىرا المايتىنىن ايتتى.
ماشينيستەردىڭ نارازىلىعىنان ميلليونداعان جولاۋشىلار جوسپارلارىنان باس تارتۋعا نەمەسە دىتتەگەن جەرىنە جەتۋدىڭ باسقا جولدارىن ىزدەۋگە ءماجبۇر بولدى.
ەرەۋىل 10 قاڭتاردا باستالىپ، جۇما، 12 قاڭتاردا اياقتالۋى ءتيىس. وسى ۋاقىتقا دەيىن گەرمانيادا پويىزدار ۋاقىتشا اپاتتىق كەستەمەن جۇرەدى.
فەرمەرلەردىڭ ەرەۋىلى
نەمىس فەرمەرلەرىنىڭ نارازىلىق شەرۋى وتكەن جىلدىڭ جەلتوقسانىنان جالعاسىپ جاتىر. دۇيسەنبىدەن باستاپ فەرمەرلەر كەيبىر تاسجولدار كىرەبەرىستەرىن تراكتورلارىمەن جاۋىپ، قالالار مەن ەلدى مەكەندەردە ميتينگ وتكىزۋدە. نارازىلىق شارالارى كولىك قوزعالىسىن قيىنداتقان.
فەرمەرلەر وتكەن جىلدىڭ سوڭىندا بيۋدجەت تاپشىلىعىن قىسقارتۋعا باعىتتالعان بىرنەشە قاتاڭ شارالار ەنگىزگەن گەرمانيا ۇكىمەتىمەن اپتا بويى كەلىسسوزدەر جۇرگىزدى.
سونىمەن قاتار بيلىك ديزەلدىك وتىنعا دوتاسيانى الىپ تاستاۋدى جانە اۋىل جانە ورمان شارۋاشىلىعىندا قولدانىلاتىن تەحنيكانى كولىك سالىعىنان بوساتپاۋدى كوزدەدى.
شارۋالاردىڭ جاپپاي نارازىلىعىنان كەيىن ۇكىمەت بيۋدجەتتى ۇنەمدەۋ شارالارىن جۇمسارتۋعا كەلىستى. اتاپ ايتقاندا، دوتاسيانى كەزەڭ-كەزەڭىمەن الىپ تاستاۋ تۋرالى شەشىم قابىلداپ، تەحنيكاعا سالىق جەڭىلدىكتەرىن قالدىردى.
دەگەنمەن بۇل شارالار فەرمەرلەردى تىنىشتاندىرۋعا كومەكتەسكەن جوق. ولار ۇكىمەتتەن سۋبسيديانى قىسقارتۋدان تولىعىمەن باس تارتۋدى تالاپ ەتىپ وتىر.