گەرمانيا تۇرعىنى كوروناۆيرۋسقا قارسى ۆاكسينانى 87 رەت الدى
ول كۇنىنە ءۇش ۆاكسينادان العان بولۋى مۇمكىن دەپ جازدى نەمىس باسىلىمى
گەرمانيا تۇرعىنى COVID-19-عا قارسى ەكپەنى 87 رەت العان. بيلىك وسىلايشا اتالعان ازامات ۆاكسينالاۋ سەرتيفيكاتتارىن زاڭسىز ساتقان دەپ سانايدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
Frei Presse نەمىس گازەتىنىڭ جازۋىنشا، 61 جاستاعى ەر ادام ساكسونيا جانە ساكسونيا-انحالت شىعىس-گەرمان جەرلەرىندەگى بىرنەشە ۆاكسينالاۋ ورتالىقتارىنا بارعان. ول كۇنىنە ءۇش ۆاكسينادان العان بولۋى مۇمكىن دەپ جازدى نەمىس باسىلىمى.
ەر ادام ۆاكسينالاۋ ورنىنا كەلگەن سايىن، ول وزىمەن بىرگە ۆاكسيناسيا تۋرالى جاڭا تازا قۇجات الىپ كەلىپ جۇرگەن. ەكپە العاننان كەيىن ول قۇجاتتان ۆاكسينا نومىرلەرى تۋرالى اقپاراتى بار بەتتەردى الىپ تاستاعان. بلانكىنى ۆاكسينانى سالدىرعىسى كەلمەيتىندەرگە ساتقان.
سونداي-اق، ەر ادام ۆاكسيناسيا ءۇشىن ءوزىنىڭ ناقتى ءاتى-جونى مەن تۋعان كۇنىن پايدالانىپ، ءبىراق مەديسينالىق ساقتاندىرۋ كارتاسىن كورسەتپەستەن تىركەلگەن.
درەزدەن قالاسىنداعى ەگۋ ورتالىعىنداعى قىزمەتكەرلەردىڭ ءبىرى بۇل ادامدى تانىعان سوڭ كۇدىكتەنە باستاعان. كەلەسى جولى ول ەيلەنبۋرگ قالاسىنداعى ەكپە ورتالىعىنا كىرگەن كەزدە قىزمەتكەرلەر پوليسيا شاقىرىپ، ەر ادام ۇستالعان.
جۋرناليستەر بۇل جاعداي گەرمانيانىڭ دەنساۋلىق ساقتاۋ جۇيەسىندەگى ولقىلىقتاردى كورسەتتى دەپ جازدى. مۇندا مەديسينالىق اقپارات نەگىزىنەن سيفرلانباعان جانە ورتالىقتاندىرىلعان جۇيەدە ساقتالماعان.
«كوروناۆيرۋسقا قارسى ۆاكسينالاردىڭ ۇلتتىق ءتىزىلىمى بۇل جاعدايدى دەرەۋ انىقتاي الار ەدى»، - دەدى ساكسونيا مەملەكەتتىك مەديسينالىق قاۋىمداستىعىنىڭ وكىلى كنۋت كەلەر گازەتكە.
گەرمانيادا ەكپە الۋعا قۇقىلى حالىقتىڭ 75%-دان استامى تولىعىمەن ۆاكسينالانسا، 58%-عا جۋىعى قايتادان ەكپە العان.