گەرمانيا راديوسىندا ديماش پەن ونىڭ ەلىنە ارنالعان باعدارلاما ەفيرگە شىقتى

ديماش پەن ونىڭ ونەرىنە دەگەن قۇرمەت

2022 جىلدىڭ 8 مامىرىندا Moviedance نەمىس راديوسىنىڭ ەفيرىندە ديماشتىڭ اندەرى العاش رەت شىرقالدى. راديو جۇرگىزۋشىسى قازاقستاندىق ورىنداۋشىنىڭ شىعارماشىلىعىن قالاي تانىسقانىن جانە وعان باعدارلاما ارناۋدى شەشكەنى تۋرالى ايتتى، دەپ حابارلايدى Almaty-akshamy.kz Dimashnews.com-عا سىلتەمە جاساپ.

نەمىس راديو جۇرگىزۋشىسى فلوريان گروگولل-وزىنىڭ Moviedance راديوستانسياسىن ەكى جىلعا جۋىق باسقارعان كاسىبي ديدجەي. باستاپقىدا ونىڭ راديوسىندا فيلمدەردەن جانە بي مۋزىكاسىنان تانىمال ساۋندترەكتەر ايتىلاتىن. الايدا اۋديتوريادان جاقسى جاۋاپ الىپ، فلوريان ءوزىنىڭ راديوباعدارلاماسىن ارنايى تاقىرىپتىق ساعاتتارمەن تۇرلەندىردى، ولاردىڭ ءبىرى ديماش پەن ونىڭ تۋعان ەلى – قازاقستان مەن مۋزىكاسىنا ارنادى.

فلوريان گروگولل Dimashnews رەداكسياسىنا ءوزىنىڭ دوسىنىڭ ۇسىنىستارىنىڭ ارقاسىندا قازاقستاندىق ورىنداۋشىنىڭ شىعارماشىلىعىمەن العاش رەت تانىسقانىمەن ءبولىستى.

«مەن ديماشتىڭ ورىنداۋىن سلاۆيان بازارىنداعى S.O.S انىمەن كوردىم، الدىمەن ونىڭ ءاندى جاندى داۋىستا ورىندايتىنىنا سەنە المادىم. سول كۇنى مەن بۇل قويىلىمدى 4 رەت قايتا قارادىم، سودان كەيىن ورىنداۋشىنىڭ ءار بەينەكليپىن كورە باستادىم، كەيبىر اندەردە ءتىپتى كوزىمە جاس كەلدى»، – دەپ ءبولىستى راديو جۇرگىزۋشىسى.

وسىلايشا، Dimash Fanclub Deutschland فان-كلۋبىمەن بىرلەسىپ ساۋالناما جۇرگىزە وتىرىپ، فلوريان قازاقستاندىق ارتىسكە ارنالعان ءوزىنىڭ العاشقى باعدارلاماسى ءۇشىن بىرنەشە ءاندى تاڭدادى.

ەفير «Dimash & Igor Special» اتاۋىمەن ءوتتى، وعان يگور كرۋتويمەن بىرگە جازىلعان ديماشتىڭ اندەرى، سونداي-اق قازاق تىلىندەگى «Samaltau»، «Daididau»، «Umytylmas kun» جانە «Mahabbat ber magan» بىرنەشە كومپوزيسياسى كىردى.

16 مامىردا فلورياننىڭ تاعى ءبىر «2decks Radio» راديوستانسياسىندا قازاقستاندىق ارتىسكە ارنالعان «ديماشتىڭ ۇزدىگى» اتتى كەزەكتى باعدارلاما وتەدى.