پرەزيدەنت وتاندىق گەولوگيا سالاسىنىڭ ارداگەرلەرىن قابىلدادى
قاسىم-جومارت توقايەۆ ەلىمىزدىڭ گەولوگيا سالاسىنا ەڭبەك سىڭىرگەن ءبىر توپ قايراتكەرمەن – ق ر ۇعا اكادەميگى سەرىكبەك داۋكەيەۆپەن، «مەريديان پەترولەۋم» ج ش س ديرەكتورى بالتابەك قۋاندىقوۆپەن، ق.ي. ساتبايەۆ اتىنداعى گەولوگيالىق عىلىمدار ينستيتۋتىنىڭ ديرەكتورى گەروي جولتايەۆپەن جانە «مينەرالدىق رەسۋرستار اكادەمياسى» قوعامدىق بىرلەستىگىنىڭ پرەزيدەنتى بولات ۇجكەنوۆپەن كەزدەستى، دەپ حابارلايدى almaty-akshamy.kz
كەزدەسۋ بارىسىندا مەملەكەت باسشىسى گەولوگيا سالاسى جالپى جەر قويناۋىن پايدالانۋ ءىسىن قارقىندى دامىتۋدىڭ نەگىزى ەكەنىن جانە ەل ەكونوميكاسىنىڭ ماڭىزدى قۇرامداس بولشەگى سانالاتىنىن اتاپ ءوتتى.
پرەزيدەنتتىڭ پىكىرىنشە، اتالعان سالاعا، اسىرەسە گەولوگيالىق بارلاۋ جانە جەر قويناۋىن كەشەندى زەرتتەۋ باعىتىنا تىڭ سەرپىن بەرۋ قاجەت. سوندىقتان جۋىرداعى جولداۋدا ۇكىمەتكە 2026 جىلعا قاراي گەولوگيالىق جانە گەوفيزيكالىق بارلاۋ كولەمىن 2،2 ميلليون شارشى شاقىرىمعا دەيىن جەتكىزۋ مىندەتى جۇكتەلدى.
مەملەكەت باسشىسىنىڭ ايتۋىنشا، گەولوگيالىق بارلاۋ سالاسىنا شەتەلدىك ينۆەستورلاردى، سونداي-اق كاپيتال مەن زاماناۋي تەحنولوگيالاردى تارتۋ ماقساتىندا كەشەندى شارالار قابىلدانىپ جاتىر. بۇل رەتتە ينۆەستيسيا ءۇشىن گەولوگيا سالاسىنىڭ اشىقتىعى مەن مەملەكەت مۇددەسى اراسىنداعى تەڭگەرىمدى ساقتاۋ ماڭىزدى.
سونىمەن قاتار كەزدەسۋدە گەولوگيا سالاسىنىڭ وزەكتى ماسەلەلەرى مەن اتالعان باعىتتى ىنتالاندىرۋعا قاتىستى ۇسىنىستار تالقىلاندى.
كەزدەسۋ سوڭىندا قاسىم-جومارت توقايەۆ وتاندىق گەولوگيا سالاسىن دامىتۋعا ەلەۋلى ۇلەس قوسقانى ءۇشىن ارداگەر عالىمدارعا العىس ايتتى.