6،3 ملن ادامنىڭ مەنشىگىندە ءۇي بار
قازاقستاندا 5،6 ملن ادامنىڭ ءبىر باسىندا ءبىر پاتەردەن بار. «وتباسى بانك» اكسيونەرلىك قوعامىنىڭ باسقارما ءتوراعاسى ءلاززات يبراگيموۆا ستراتەگيالىق باستامالار فورمۋىندا وسىنداي مالىمەت كەلتىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ازاماتتارعا ارنالعان ۇكىمەت» كوممەرسيالىق ەمەس اكسيونەرلىك قوعامىنىڭ دەرەكتەرى بويىنشا، 2021 جىلدىڭ اياعىندا 6،3 ملن ادامنىڭ مەنشىگىندە ءۇي بار. 19 ملن حالىق بار دەسەك، سونىڭ ىشىندە 6،3 ملن دەگەن جامان ستاتيستيكا ەمەس. ەگەر بىزدە 10 ميلليونعا جۋىق ەكونوميكالىق بەلسەندى حالىق بار دەسەك، 60 پايىزىنىڭ مەنشىگىندە ءۇي بار بولىپ شىعادى. بۇل تاۋەلسىزدىكتىڭ 30 جىلدىعىنداعى جاقسى كورسەتكىش. ەگەر قۇرىلىمىنا زەر سالساق، 5،6 ملن ادامنىڭ ءبىر باسىندا جالعىز باسپانا بار. جۋرناليستەر مەنەن «وتباسى بانك» ءتوراعاسى رەتىندە «ءبىر باسىندا ەكىدەن كوپ پاتەر بار نەشە ادام بار؟» دەپ ىلعي سۇرايدى. قازاقستاندا ونداي 717 مىڭ ادام بار. بۇلاردى ورتا ساناتقا ەركىن كىرگىزۋگە بولاتىن شىعار» -دەدى» وتباسى بانك» باسشىسى.
سونداي-اق، ءبىر باسىندا ەكىدەن ارتىق باسپاناسى بار ادامداردىڭ قۇرىلىمىنا تالداۋ جاسالدى.
«ياعني، ەكىدەن كوپ پاتەرى بار. ونىڭ ىشىندە 607 مىڭ ادامنىڭ باسىندا ەكى پاتەر، 84 394 ادامنىڭ اتىندا 3 جىلجىمايتىن مۇلىك تىركەلگەن. 16 509 ادامنىڭ اتىندا 4 جىلجىمايتىن مۇلىك نىسانى تىركەلگەن. ءبىر باسىندا 5 نىسانى بارلاردىڭ سانى الدەقايدا از – 4 823. 1 935 ادامدا 6 پاتەردەن بار. 742 ادامدا 7 پاتەردەن بار. وسىلايشا پاتەر سانى كوبەيگەن سايىن ادام سانى ازايا تۇسەدى. ءبىراق شامامەن 147 ادام بار، ولاردىڭ اتىنا 20-دان استام باسپانا تىركەلگەن»، - دەدى ءلاززات يبراگيموۆا.