بۇگىن الماتىداعى ۇلتتىق كىتاپحانادا كورنەكتى اقىن ءادىلعازى قايىربەكوۆتىڭ 70 جاسقا تولۋ مەرەيتويىنا وراي «عازالعۇمىر» اتتى اقىن بەنەفيسى ءوتتى، - دەپ حابارلايدى aqshamnews.
ءادىلعازى قايىربەكوۆ – بەلگىلى قوعام جانە مادەنيەت قايراتكەرى، كورنەكتى اقىن، حالىقارالىق «الاش» ادەبي سىيلىعىنىڭ لاۋرەاتى، «قۇرمەت وردەنىنىڭ»، «ەرەن ەڭبەگى ءۇشىن» مەدالىنىڭ يەگەرى، س. مۇقانوۆ پەن ع. مۇسىرەپوۆتىڭ ادەبي-مەموريالدىق مۋزەي كەشەنىنىڭ اعا عىلىمي قىزمەتكەرى، فيلولوگيا عىلىمدارىنىڭ كانديداتى.
كورنەكتى اقىن 1978 جىلى ەڭبەك جولىن س. مۇقانوۆ ادەبي-مەموريالدىق مۋزەي-ۇيىنىڭ تۇڭعىش ەكسكۋرسيا جەتەكشىسى بولىپ باستاعان. 1980-2000 جىلدارى بۇقارالىق اقپارات قۇرالدارىندا (قازاق تەليەۆيزياسى، «لەنينشىل جاس» (قازىرگى «جاس الاش»)، «حالىق كەڭەسى»، «قازاق ەلى»، «شالقار» گازەتتەرىنىڭ رەداكسيالارىندا) قىزمەت ىستەگەن. 2000 جىلدان بەرى مۋزەي كەشەنىنىڭ ديرەكتورى، جەتەكشىسى، اعا عىلىمي قىزمەتكەرى. قازاقستان جازۋشىلار وداعىنىڭ باسقارما مۇشەسى، پوەزيا كەڭەسىنىڭ ءتوراعاسى. 2014 جىلى 10 تومدىق شىعارمالار جيناعى جارىق كورگەن.
اقىن بەنەفيسىندە «عازالعۇمىر» جىر جيناعى، «كوك داپتەر» ماقالالار جيناعى جانە «بيبليوگرافيالىق كورسەتكىش» اتتى كىتاپتارى تانىستىرىلدى. اقىننىڭ سوزىنشە كەشتى وتكىزۋدەگى باستى ماقساتى وقىرماندارى، زامانداستارى الدىندا ەسەپ بەرۋ.
اقىننىڭ بەنەفيسىن نە ءۇشىن «عازالعۇمىر» دەپ اتاعانى تۋرالى سۇراققا اۆتور: – «عازال» بۇل، شىعىستىق ۇعىمدا «جىر» دەگەن ماعىنا بىلدىرەدى. «جىرعۇمىر» دەگەن ءسوز. ءومىرىڭ تۇگەل ولەڭمەن ءوتۋ اقىن ءۇشىن ارمان، – دەگەن داۋابىن بەردى.
ءىس-شارانى الماتى قالاسى مۋزەيلەر بىرلەستىگى جانە قازاقستان جازۋشىلار وداعى ۇيىمداستىردى. ونىڭ ماقساتى – قازاق ادەبيەتى مەن مادەنيەتىن دامىتۋدا جەمىستى ەڭبەك ەتىپ كەلە جاتقان ءسوز شەبەرى ءادىلعازى قايىربەكوۆتىڭ ءومىرى مەن شىعارماشىلىعىن ناسيحاتتاۋ.
اتالعان شاراعا الماتى قالاسى اكىمىنىڭ ورىنباسارى ازامات قالدىبەكوۆ، قازاقستان جازۋشىلار وداعىنىڭ باسقارما ءتوراعاسى مەرەكە قۇلكەنوۆ باستاعان اقىن، جازۋشىلار، م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ باستاعان بەلگىلى تۇلعالار، عالىمدار، ادەبيەت زەرتتەۋشىلەرى، مۋزەي قىزمەتكەرلەرى، ب ا ق وكىلدەرى جانە وزگەدە ادەبيەتسۇيەر قاۋىم جينالدى.
قالا اكىمىنىڭ ورىنباسارى ازامات قالدىبەكوۆ ءادىلعازى قايىربەكوۆكە پرەزيدەنتتىڭ قۇتتىقتاۋ حاتى مەن توسبەلگىنى تابىستادى. سونداي-اق مادەنيەت جانە اقپارات ءمينيسترى ايدا بالايەۆانىڭ ارنايى قۇتتىقتاۋ حاتىن ۇلتتىق كىتاپحانا ديرەكتورى عازيزا نۇرعالييەۆا تابىستادى.
كەشتى مودەراتور رەتىندە جۋرناليست، قوعام قايراتكەرى، قازاقستان جازۋشىلار وداعىنىڭ باسقارما ءتوراعاسىنىڭ باس كەڭەسشىسى ءامىرجان قوسان جۇرگىزدى. ول العى سوزىندە اقىننىڭ كاسىبي بىلىگىمەن قوسا ادامي قاسيەتتەرى جايلى دا اتاپ ءوتتى.