گاز قوستىرۋ قۇنى تومەندەۋى مۇمكىن

بۇل تۋرالى ەنەرگەتيكا ءمينيسترى بولات اقشولاقوۆ ايتتى.

قازاقستاندا گازعا قوسىلۋ قۇنىن تومەندەتۋ جولدارى قاراستىرىلىپ جاتىر، دەپ حابارلايدى Almaty-akshamy.kz

ونىڭ ايتۋىنشا، ءقازىر باعانى تومەندەتۋ باعىتىندا جۇمىستار ءجۇرىپ جاتىر.

"شىنىمەن، بىزدە گازعا قوسىلۋ قۇنى جوعارى. ءقازىر مۇنى شەشۋدىڭ جولدارىن ىزدەپ جاتىرمىز. ءوڭىر اكىمدىكتەرى مەن "Qazaqgaz" بىرلەسىپ باعاسىن ءتۇسىرۋ ءۇشىن جۇمىستار جۇرگىزىپ جاتىر. بۇگىن ۇكىمەت وتىرىسىندا الماتى وبلىسىنىڭ اكىمى قوسىلۋ قۇنى ەكى ەسە تومەندەتىلگەنىن ايتتى. وسىنداي جۇمىستاردى ءار وڭىردە اتقارۋىمىز كەرەك"، - دەدى اقشولاقوۆ.

ول گازعا قوسىلۋ قۇنى قانشاعا تومەندەيتىنىن ايتا المادى. ءبارى جابدىقتاردىڭ قۇنىنا بايلانىستى دەيدى.

"گازعا قوسىلۋ ءۇشىن پايدالانىلاتىن جابدىقتاردىڭ بىرنەشە ءتيپى بار. مىسالى، ۇيگە قۇبىر تارتۋ كەرەك، ودان كەيىن ەسەپتەۋ جۇيەسى، گازدى پايدالاناتىن جانە بولەتىن قازاندىق كەرەك. سول سەبەپتى جابدىقتىڭ قۇنىنا قاراۋ قاجەت. وكىنىشكە قاراي، بىزدە ول جابدىقتار شىعارىلمايدى. ءبىز ونى سىرتتان تاسيمىز. اۋقىمدى گازداندىرۋعا كوشسەك، وسى ماتەريالداردىڭ ءوندىرىسىن قالاي جولعا قوياتىنىمىزدى ويلاستىرۋ كەرەك"، - دەدى مينيستر.

بۇعان دەيىن مينيستر ەلىمىزدىڭ شىعىس وڭىرلەرىن گازداندىرۋ ءۇشىن رەسەيدەن گاز يمپورتتالۋى مۇمكىن ەكەنىن مالىمدەگەن ەدى.