بۇۇ قازاقستانداعى تۇراقتى ۇيلەستىرۋشىسىنىڭ كەڭسەسى الداعى ۋاقىتتا ەلىمىزدەگى مەملەكەتتىك ينستيتۋتتاردى نىعايتۋ، ادام قۇقىقتارىن قورعاۋ ماسەلەلەرىنە باسا نازار اۋدارادى. بۇل تۋرالى بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري ق ر پرەزيدەنتى جانىنداعى مەملەكەتتىك باسقارۋ اكادەمياسىندا وتكەن كەزدەسۋ بارىسىندا ايتتى، دەپ حابارلايدى اlmaty-akshamy.kz
بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري «بۇۇ-نىڭ قازاقستانداعى ەلدىك كومانداسىنىڭ قىزمەتىنە شولۋ: نەگىزگى باعىتتارى مەن دامۋ پەرسپەكتيۆالارى» تاقىرىبىندا ءدارىس وقىدى. اكادەميانىڭ ماگيسترانتتارى مەن دوكتورانتتارىنا، قىزمەتكەرلەرىنە ەلىمىزدىڭ تۇراقتى دامۋ سالاسىنداعى كۇش-جىگەرى جانە ونىڭ حالىقارالىق ارەناداعى ءرولى تۋرالى ايتىپ بەردى.
ميكاەلا فريبەرگ-ستوري حانىمنىڭ ايتۋىنشا، بۇۇ قازاقستان ۇكىمەتىمەن، ازاماتتىق قوعاممەن بىرلەسە وتىرىپ، باستى نازار اۋداراتىن ءۇش نەگىزگى باعىتتى ايقىنداعانىن ايتتى.
«بىرىنشىدەن، ءاربىر جەكە تۇلعانىڭ بولاشاعى ءۇشىن قاجەتتى ءبىلىم الۋعا، داعدىلاردى مەڭگەرۋگە مۇمكىندىك جاساۋعا باستى نازار اۋدارامىز. بۇعان ءبىلىم بەرۋمەن قاتار، كاسىپكەر ايەلدەردى وقىتۋ ماسەلەسى دە كىرەدى. ەكىنشىدەن، مەملەكەتتىك ينستيتۋتتاردى نىعايتۋعا، ادام قۇقىقتارىن قورعاۋعا باسا نازار اۋدارۋ ماڭىزدى. تۇيتكىلدى ماسەلەلەرىن شەشۋدە ادامداردىڭ مەملەكەتتىك قىزمەتكەرلەرمەن دۇرىس بايلانىس ورناتۋى دا ماڭىزدى ماسەلە. سونىمەن قاتار ءتۇرلى مەكەمەلەردىڭ، جەرگىلىكتى اتقارۋشى ورگانداردىڭ كاسىبي دەڭگەيىن ارتتىرۋ – باستى باعىتىمىزدىڭ ءبىرى. ۇشىنشىدەن، تۇراقتى ەكونوميكالىق ءوسىم مەن كليماتتىڭ وزگەرۋى ماسەلەلەرىن شەشۋگە قولداۋ كورسەتەمىز»، – دەپ ءتۇسىندىردى بۇۇ-نىڭ قازاقستانداعى تۇراقتى ۇيلەستىرۋشىسى.
مەملەكەتتىك قىزمەتشىلەرمەن كەزدەسۋگە بۇۇ-نىڭ تۇراقتى ۇيلەستىرۋشىسى كەڭسەسىنىڭ وكىلدەرى: RCO Kazakhstan توبىنىڭ جەتەكشىسى كۋرتموللا ابدۋلگانييەۆ، RCO Kazakhstan سەرىكتەستىك قارىم-قاتىناستى دامىتۋ جونىندەگى كوورديناتورى دينا حاسەنوۆا دا قاتىستى.