گاز قوستىرۋ قۇجاتىن الۋ ءتارتىبى جەڭىلدەتىلدى

تەحنيكالىق شارتتار تەگىن جانە ونلاين رەجيمىندە بەرىلەدى.

قازاقستاندىقتار ءۇشىن گاز قوستىرۋ كەزىندە ءبىرىنشى قۇجاتتى الۋ ءتارتىبى جەڭىلدەتىلدى، دەپ حابارلايدى Almaty-akshamy.kz ەنەرگەتيكا مينيسترلىگىنىڭ باسپا ءسوز قىزمەتىنە سىلتەمە جاساپ.

«تەحنيكالىق شارتتاردى الۋعا ءوتىنىمدى ونلاين رەجيمىندە «قازترانسگاز ايماق» اق سايتىنداعى تۇتىنۋشىنىڭ جەكە كابينەتىندە، سونداي-اق كومپانيانىڭ وڭىرلەردەگى وندىرىستىك فيليالدارىنىڭ مەكەنجايلارى بويىنشا بەرۋگە بولادى»، - دەپ جازىلعان حابارلامادا.

ەنەرگەتيكا مينيسترلىگىندەگىلەر ءوتىنىش وڭدەلگەننەن كەيىن، دايىن تەحنيكالىق شارتتى SMS حابارلاما تۇرىندە جولدانعان سىلتەمەدەن جۇكتەپ الۋعا بولاتىنىن ءتۇسىندىردى.

ۆەدومستۆوداعىلار اتاپ وتكەندەي، «قازترانسگاز ايماق» اق قۇجاتتاردى بەرۋدى تەگىن جۇزەگە اسىرادى.

«تەحنيكالىق شارتتاردى بەرگەنى ءۇشىن اقى تالاپ ەتسە، سونداي-اق كومپانيا قىزمەتكەرلەرىنىڭ زاڭسىز جانە سىبايلاس جەمقورلىق بەلگىلەرى بار ارەكەتتەرىنىڭ باسقا دا فاكتىلەرى انىقتالسا، حابارلاۋدى سۇرايمىز. «قازترانسگاز ايماق» اق ءبىرىڭعاي بايلانىس ورتالىعىنا 5169 تەلەفونى نەمەسە +7 777 121 26 26 نومىرىندەگى مەسسەندجەرلەر ارقىلى جازىپ، قوڭىراۋ شالۋعا بولادى. قازاقستان اۋماعىنان قوڭىراۋ شالۋ تەگىن»، - دەدى مينيسترلىكتەگىلەر.