قازاقستاندا سىرتتان تاماقتانۋ قىمباتتاپ كەتتى.
ۇلتتىق ستاتيستيكا بيۋروسىنىڭ مالىمەتىنشە، اسحانا قىزمەتتەرى ءبىر جىلدا 26،6%، فاست-فۋد ۇيىمدارىنىڭ قىزمەتى - 17،1%، مەيرامحانالار مەن ءدامحانالار قىزمەتى - 20،6% قىمباتتاعان، دەپ حابارلايدى Almaty-akshamy.kz Ranking.kz-كە سىلتەمە جاساپ.
اي سايىنعى ديناميكا بويىنشا باعانىڭ ءوسۋىن جەتىسۋ ءوڭىرىنىڭ تۇرعىندارى ءبىرىنشى كەزەكتە سەزىندى: بۇل ايماقتا تاماقتانۋ بىردەن 13،9%-عا قىمباتتاعان. العاشقى ۇشتىككە شىمكەنت پەن الماتى وبلىسى دا كىردى: سايكەسىنشە، ايىنا +9،9% جانە +7،3%-دىق ءوسىم. جەتى وبلىستا ءبىر ايدا باعا وزگەرگەن جوق.
جىلدىق ديناميكا بويىنشا باعانىڭ ەڭ قاتتى ءوسۋى ءدال سول جەتىسۋ وبلىسىندا تىركەلگەن: بىردەن 44،7% قىمباتشىلىق. باعالار شىمكەنتتە (40،3%-عا) جانە ەلوردادا دا (38،5%-عا) ايتارلىقتاي ءوستى. باعانىڭ ەڭ از ءوسىمى پاۆلودار وبلىسىندا بايقالدى: مۇندا جىلىنا 6،2%-عا قىمباتتاعان.
مەيرامحانالار مەن ءدامحانالار قىزمەتى باعاسىنىڭ ەڭ كوپ جىلدىق ءوسۋى جەتىسۋ وبلىسىندا (44،4%)، ەڭ ازى – الماتى قالاسىندا (5،2%) تىركەلدى.
فاست-فۋد ۇيىمدارىنىڭ قىزمەتتەرىنە باعانىڭ نەعۇرلىم ەلەۋلى ءوسۋى اتىراۋ وبلىسىندا (38%)، ەڭ ازى – پاۆلودار وبلىسىندا (4،5%) بايقالدى.
اسحانا قىزمەتى ەڭ كوپ جەتىسۋ وبلىسىندا (52%)، ەڭ از پاۆلودار وبلىسىندا (7%) قىمباتتادى.
2022 جىلدىڭ قاراشا ايىنىڭ قورىتىندىسى بويىنشا قوعامدىق تاماقتانۋ ۇيىمدارىنىڭ قىزمەتى ءبىر ايدا 2،7%، ءبىر جىلدا 23،4% قىمباتتادى.