ەڭبەك ادامى
الماتىداعى 5571 اسكەري ءبولىم – مەگاپوليستىڭ تىنىشتىعىن قامتاماسىز ەتەتىن ماڭىزدى قۇرىلىم. بۇل ءبولىم ساربازدارى كۇن سايىن ىشكى ءتارتىپتى كۇزەتۋ ءۇشىن كەزەكشىلىككە شىعادى. ولاردىڭ قىزمەتى كورىنگەنىمەن، ساربازداردىڭ رۋحاني جاعدايى مەن پسيحولوگيالىق تۇراقتىلىعىنا جاۋاپ بەرەتىن مامانداردىڭ ەڭبەگى ءاردايىم بايقالا بەرمەيدى. وسى بولىمدەگى اعا لەيتەنانت، بريگادانىڭ پسيحولوگيالىق قامتاماسىز ەتۋ قىزمەتىنىڭ اعا وفيسەرى گاۋھار سايلاۋحان قىزى ساربازداردىڭ كۇندەلىكتى كۇيزەلىستەرىن ءتۇسىنىپ، ولاردىڭ اسكەري ورتاعا بەيىمدەلۋىنە كومەكتەسەدى.
گاۋھار حانىمنىڭ اسكەري سالاعا كەلگەن جولى ەرەكشە. العاشىندا مەكتەپتە پسيحولوگ بولىپ جۇمىس ىستەپ ءجۇرىپ، قىسقارتۋ سالدارىنان جاڭا قىزمەت ىزدەيدى. 2016 جىلى اسكەرگە قابىلدانىپ، ءومىرىنىڭ جاڭا تاراۋىن باستايدى. «اسكەري ورتا مەن ءۇشىن كۇتپەگەن وزگەرىس بولدى. الايدا، بۇل شەشىمىمە ەشقاشان وكىنگەن ەمەسپىن. ساربازدارمەن جۇمىس ىستەۋ ماعان شابىت بەرەدى»، – دەيدى ول.
ءقازىر گاۋھار حانىم 1300-دەن استام ساربازدىڭ پسيحولوگيالىق دايىندىعىنا جاۋاپتى. اسكەر قاتارىنا جاڭادان كەلگەن جاستاردى زەرتتەۋ، ولاردىڭ مورالدىق جاعدايىن باقىلاۋ، بەيىمدەلۋ كەزەڭىن جەڭىلدەتۋ – بۇل جۇمىستىڭ نەگىزگى بولىگى.
كۇزگى اسكەرگە شاقىرىلۋ ناۋقانى كەزىندە بولىمگە كەلەتىن ساربازداردىڭ ءارقايسىسى مۇقيات تەكسەرۋدەن وتەدى. گاۋھار حانىمنىڭ ايتۋىنشا، جاستاردىڭ اسكەري ومىرگە بەيىمدەلۋى ءارتۇرلى ۋاقىت الادى. كەيبىرەۋى ورتاعا تەز ءسىڭىپ كەتسە، ەندى ءبىرى ۇزاق ۋاقىت بويى جاڭا تارتىپكە ۇيرەنە المايدى. وسى كەزدە پسيحولوگتاردىڭ جۇمىسى ماڭىزدى ءرول اتقارادى.
«اسكەرگە كەلگەن ءار بالانىڭ جان-دۇنيەسىنە ءۇڭىلىپ، ونىڭ ماسەلەلەرىن تۇسىنۋگە تىرىسامىز. ءتۇرلى ادىستەمەلىك جاتتىعۋلار، ساۋالنامالار ارقىلى ولاردىڭ مىنەز-قۇلقى مەن پسيحولوگيالىق جاعدايىن انىقتايمىز. كۇيزەلىستەگى ساربازدارمەن جەكە جۇمىس جۇرگىزەمىز»، – دەيدى گاۋھار حانىم.
اسكەردەگى ءاربىر سارباز كەزەكشىلىككە تەك پسيحولوگتىڭ رۇقساتىمەن عانا شىعادى. بۇل ولاردىڭ قاۋىپسىزدىگىن قامتاماسىز ەتۋدەگى ماڭىزدى قادام. «جاستاردىڭ ءارتۇرلى جەكە ماسەلەلەرى بولادى. اتا-اناسىمەن نەمەسە جاقىندارىمەن جانجالداسۋى ولاردىڭ مىنەزىنە اسەر ەتۋى مۇمكىن. سوندىقتان ساربازداردى ۇنەمى باقىلاپ، كۇيزەلىس بەلگىلەرىن انىقتاپ وتىرامىز»، – دەپ تۇسىندىرەدى كەيىپكەرىمىز.
گاۋھار حانىم كوپتەگەن ساربازدىڭ تاعدىرىمەن بەتپە-بەت كەلگەن. ونىڭ ايتۋىنشا، كەيدە اسكەري قىزمەتكە جارامسىز جاستار اسكەرگە الىنىپ جاتادى. «
بىردە اسكەرگە پسيحولوگيالىق اۋىتقۋلارى بار بالا كەلدى. قاراپايىم ورتاعا بەيىمدەلە الماعاندىقتان، اسكەردەگى ءتارتىپ وعان اۋىر ءتيدى. ءتورت ايلىق باقىلاۋدان كەيىن ونىڭ دەنساۋلىعى اسكەرگە جارامسىز ەكەنىن انىقتاپ، ۇيىنە قايتاردىق»، – دەيدى ول.
سونىمەن قاتار، اسكەردە ءومىرى تۇبەگەيلى وزگەرگەن جاستار دا بار. «الەۋمەتتىك ورتادان وقشاۋ وسكەن ءبىر ساربازدىڭ بويىنداعى تۇيىقتىقتى جەڭۋگە ءبىر جىل ۋاقىت جۇمسادىق. اقىرىندا ول اسكەري تارتىپكە بەيىمدەلىپ، جاڭا ورتاعا ۇيرەندى. ءقازىر ول الەۋمەتتىك جەلىلەر ارقىلى بايلانىسقا شىعىپ، العىس بىلدىرەدى. وسىنداي جەتىستىكتەر ءبىزدىڭ جۇمىسىمىزدىڭ ماڭىزدىلىعىن دالەلدەيدى»، – دەيدى گاۋھار حانىم.
كەيىپكەرىمىز اسكەري پسيحولوگتىڭ ءرولىن ايەل ادام جاقسى اتقاراتىنىنا سەنىمدى. «ايەلدەر مەيىرىمدىلىگى مەن جاۋاپكەرشىلىگىنىڭ ارقاسىندا ساربازدارعا ەرەكشە كوڭىل بولەدى. جاستاردى ءتۇسىنىپ، ولارعا قولداۋ كورسەتۋدە ايەلدىڭ جۇمساق مىنەزى وتە ماڭىزدى»، – دەپ اتاپ ءوتتى ول.
گاۋھار حانىمنىڭ تاعى ءبىر ەرەكشەلىگى – ونىڭ تيكتوك جەلىسىندەگى بەلسەندىلىگى. وندا ول اسكەري ءومىردىڭ قىزىقتى ساتتەرىمەن ءبولىسىپ، ساربازداردىڭ اتا-انالارىنا ۇلدارىنىڭ ومىرىنەن حابار بەرەدى.
«الەۋمەتتىك جەلى ارقىلى اتا-انالار بالالارىنىڭ اسكەري ءومىرىن كورىپ، ۋايىمدارىن باسادى. بۇل بىزگە ساربازداردىڭ جاقىندارىمەن بايلانىس ورناتۋعا كومەكتەسەدى»، – دەيدى ول.
اسكەري پسيحولوگتىڭ جۇمىسى سىرت كوزگە بايقالماسا دا، ول ساربازداردىڭ مورالدىق تۇراقتىلىعىن قامتاماسىز ەتۋدەگى نەگىزگى كۇش. گاۋھار سايلاۋحان قىزىنىڭ قاجىرلى ەڭبەگى، ساربازدارعا كورسەتكەن قامقورلىعى – وتان قورعاۋشىلاردى تاربيەلەۋدەگى ماڭىزدى ۇلەس. ونىڭ جۇمىسى ەلىمىزدىڭ بولاشاعىنا دەگەن سەنىمدى نىعايتادى.