الماتىدا 2025 جىلى قالانىڭ باستى تابيعي نىساندارىنىڭ ءبىرى بولىپ تابىلاتىن باۋم توعايىن اباتتاندىرۋ جوباسىن ىسكە اسىرۋ جوسپارلانعان. توعايدىڭ اۋدانى 137،7 گا قۇرايدى، ول تۇركسىب اۋدانىندا سەيفۋللين مەن ءسۇيىنباي داڭعىلدارىنىڭ اراسىندا ورنالاسقان.
2025-2027 جىلدارعا ارنالعان بيۋدجەتتىڭ ءتيىستى جوباسىن الماتى ءماسليحاتىنىڭ الداعى سەسسياسىندا قاراۋ جوسپارلانۋدا. بۇل تۋرالى قالالىق ءماسليحاتتىڭ باسپا ءسوز قىزمەتى حابارلادى.
جوبانىڭ ماقساتى-توعايدى ەكولوگيالىق ماڭىزى بار اۋماق رەتىندە جاڭعىرتۋ، تۇرعىندار اراسىندا ەكو-سانانى دارىپتەۋ. ءتاسىلدىڭ ەرەكشەلىگى-توعايدىڭ تابيعي كومپونەنتىنە مينيمالدى ارالاسۋ.
اۋماقتا شاعىن ارحيتەكتۋرالىق فورمالار پايدا بولادى: ورىندىقتار، بەسەدكالار، ۋرنالار، سونداي-اق بالالار ويىندارى مەن سپورتقا ارنالعان جابدىقتار. كوگالداندىرۋ كەزىندە ەروزيانى بولدىرماۋ جانە جەر جۇمىستارىن ازايتۋ ءۇشىن تابيعي رەلەف پەن جەر جامىلعىسى ساقتالادى.
باۋم توعايى ءۇش ايماققا بولىنەدى:
• بەلسەندى ايماق-اشىق ينفراقۇرىلىمعا قولجەتىمدىلىكتى قامتاماسىز ەتۋ ءۇشىن توعايدىڭ پەريمەترى بويىنشا ورنالاسادى.
• رەكرەاسيالىق ايماق-ەڭ از ينفراقۇرىلىمى بار تىنىش دەمالىس ورنى بولادى.
• ەكو-ايماق-شەكتەۋلى ارالاسۋمەن تابيعي فلورا مەن فاۋنانى ساقتاۋعا جانە قالپىنا كەلتىرۋگە ارنالعان.
بۇكىل جوبا ءۇش نەگىزگى قاعيداعا نەگىزدەلگەن: قالپىنا كەلتىرۋ، ەكو-ايماقتارعا ءبولۋ جانە قاۋىپسىزدىك. اباتتاندىرۋدى جۇزەگە اسىرۋ توعايدى قالا تۇرعىندارى ءۇشىن زاماناۋي، ەكولوگيالىق جانە جايلى دەمالىس ايماعىنا اينالدىرۋعا باعىتتالعان.